Feðgarnir Magnús Ölver Ásbjörnsson og Ásbjörn Ingi Magnússon drógu hrefnu á flot sem strandað hafði í fjörunni fyrir innan Hellu í Steingrímsfirði í dag. Karlína Rós, dóttir Magnúsar, stóð í fjörunni og náði myndbandi af björguninni.
„Við vorum bara að koma úr kaupstaðarferð frá Hólmavík og sáum hana frá veginum,“ segir Magnús í samtali við Vísi, en fjölskyldan er búsett á Drangsnesi.
„Við vorum þarna í svona hálftíma og ákváðum síðan að bruna heim, fara í flotgalla, og ýta henni út áður en það fjaraði meira út.“
Magnús segir í myndbandinu að um jólagóðverkið sé að ræða og fær hrefnan meira að segja jólakveðju þegar hún syndir á brott.
Myndbandið má sjá í spilaranum hér fyrir ofan.
Innlent
