Enginn borgi meira en 100 þúsund á ári

Heilbrigðisráðherra gerir ráð fyrir að þak verði sett á kostnaðarþáttöku sjúklinga í heilbrigðisþjónustu síðar á árinu. Samkvæmt frumvarpi hans ætti enginn að borga meira en hundrað þúsund krónur á ári í sjúkrakostnað. Aukið fé verður þó ekki sett í málaflokkinn.

Kristján Þór Júlíusson, heilbrigðisráðherra, kynnti frumvarp um þak á kostað sjúklinga fyrir ríkisstjórninni í gær og gerir hann ráð fyrir að málið verði tekið fyrri í þinginu fljótlega.

Í grófum dráttum verður greiðslukerfi fyrir heilsugæslu, sjúkrahús, sjálfstætt starfandi sérfræðingar, rannsóknir, geisla- og myndgreiningar og sjúkraþjálfun, sem áður voru með mismunandi afsláttarfyrirkomulagi, sett í eitt kerfi með sameiginlegt hámark. Gjaldflokkarnir verða tveir, einn almennur og annar fyrir öryrkja, aldraða og börn.

„Hæsti flokkurinn, það er gert ráð fyrir því að þakið verði í 95 þúsund króna útgjöldum af þeirri þjónustu sem þarna liggur undir á ári. Meðan að lægsti flokkurinn gæti legið einhverstaðar í kringum 44 þúsund krónur á ári. Þetta er hins vegar háð miklum fyrirvörum en þarna á milli ætti þetta að sveiflast,“ segir Kristján Þór. 

Nýja kerfið gengur út á að jafna kostnað þeirra sem þurfa á mikilli heilbrigðisþjónustu að halda og dreifa á þá sem nota þjónustuna lítið.

„Það þýðir það að við erum að draga úr kostnaði um tíu þúsund einstaklinga og fjölda barnafjölskyldna og láta þá sem sjaldnar, sem betur fer, eiga viðskipti við heilbrigðiskerfið bera örlítið þyngri kostað en þeir ella hefðu gert,“ segir Kristján Þór. 

Þessum breytingum fylgir ekkert aukafjármagn inn í heilbrigðiskerfið en Kristján er þrátt fyrir það bjartsýnn á að það verði afgreitt hratt í þinginu.

„Ég er þeirrar skoðunar og tel að það sé mjög breið pólitísk sátt um það að breyta greiðslukerfinu. Einfalda það og gera það í rauninni sanngjarnara og auðlæsilegra heldur en það hefur verið,“ segir Kristján Þór Júlíusson.