Dirk Kuyt: Hefði þurft að sætta mig við 80 prósent launalækkun

Dirk Kuyt hefur útilokað það að hann sé á leiðinni frá Liverpool til hollenska félagsins Feyenoord. Kuyt missti fast sæti í Liverpool-liðinu í vetur og hefur verið orðaður við sitt gamla félag.

„Sú staðreynd að ég ræddi við Feyenoord gefur skýr skilaboð um það að þessu fylgdi mikil alvara af minni hálfu. Bilið er bara of mikið eins og staðan er núna," sagði Dirk Kuyt við hollenska blaðið AD Sportwereld.

„Ef ég færi aftur til Hollands þá þyrfti ég að taka á mig 80 prósent launalækkun. Það er kannski möguleiki þegar þú ert 35 eða 36 ára og ferillinn er nánast búinn. Málið er að ég er bara 31 árs og enn í fullu fjöri. Ég á eftir tvö til þrjú ár á toppnum," sagði Dirk Kuyt.

Dirk Kuyt var "bara" með 2 mörk og 2 stoðsendingar í 34 leikjum með Liverpool í ensku úrvalsdeildinni á þessu tímabili en hann kom inn á sem varamaður í tólf þeirra. Kuyt var með 13 mörk og 8 stoðsendingar í 33 leikjum á síðustu leiktíð.