Da Vinci fléttan: Unnu náið með fórnarlambinu

Í bæklingi frá Universal Sacred Music kemur fram að Helga Ingvarsdóttir gengdi stöðu gjaldkera í stjórn félagsins. Forseti samtakanna er Roger Davidson og unnusti Helgu, Vickram Bedi er varaforseti samtakanna sem snúast um trúarlega klassíska tónlist.

Ingvar J. Karlsson, faðir Helgu, sagði á Vísi fyrr í dag að hann tryði á sakleysi dóttur sinnar. Hann mun vera á leið til New York þar sem hann mun veita Helgu og unnusta hennar stuðning í réttarhöldunum sem hefjast í Desember.

Málið allt hefur vakið mikla athygli hér heima og vestra þar sem svik Helgu og unnusta hennar eru sögð hafa verið með miklum eindæmum. Festu þau tónlistarmanninn Roger Davidson í vef svika og blekkinga þar sem komu við sögu leynileg trúarleg samtök og líflátshótanir.

Hefur bókin Da Vinci Code borið á góma þar sem trúarreglan sem þau skötuhjú er sögð hafa notað til að hræða Roger Davidson heita Opus Dei og koma við sögu í þeirri bók.

Í viðtali sem birtist við Ingvar á vef Pressunnar heldur faðir Helgu því fram að Roger Davidson hafi verið ástfangin af Helgu. Það er að minnsta kosti ljóst að Roger hafði bæði Helgu og Vickram unnusta hennar í miklum metum en í yfirlýsingu sem Pressan vitnar til frá Roger Davidson segist hann hafa þekkt Vicram Bedi í meira en fimmtán ár og minnist einnig á að Helga hafi reynst góður vinur og hjálparhella í stjórn samtakanna.