Commerzbank eignast hluta af hjarta Reykjavíkur

Þýski bankinn Commerzbank mun eignast hluta af hjarta miðborgarinnar. Bankinn tekur hann upp í kröfur sem hann á hendur Samson eignarhaldsfélagi.

Samson seldi Samson Properties ehf á fyrstu mánuðum ársins 2008. Söluverðið nam rúmum 11 og hálfum milljarði og fékk Samson meðal annars greitt í hlutabréfum í Novator Properties. Novator Properties er í 70% eigu Samson, sem er í eigu feðganna Björgólfs Guðmundssonar og Björgólfs Thors Björgólfssonar. Restin er í eigu innlendra og erlendra fjárfesta.

Um 80% eigna Novator Properties eru utan Íslands, t.a.m. í Danmörku, Finnlandi, Búlgaríu og Króatíu. Samson Properties varð við söluna dótturfélag Novators og sá alfarið um rekstur verkefna félagsins á Íslandi. Um er að ræða 2 stór verkefni, annars vegar uppbygging Listaháskóla Íslands í miðborginni og þróun verslunar- og þjónustukjarna á efri hluta Laugavegar, hinum svo kallaða Barónsreit. Barónsreitur telur húseignir við Laugaveg, Frakkastíg, Hverfisgötu og Skúlagötu.

Commerzbank á rúmlega 23 milljarða kröfu á Samson eignarhaldsfélag og fór bankinn fram á synjun á áframhaldandi greiðslustöðvun Samson. Frestur til að lýsa kröfu í þrotabúið er til 20. Janúar 2009 og verður skiptafundur haldinn mánuði síðar. Við það mun Commerzbank ásamt öðrum kröfuhöfum eignast hlut Samsonar í Novator Properties, alls 69%. Commerzbank er þar stærsti kröfuhafinn. Ásgeir Friðgeirsson, talsmaður Björgólfsfeðga staðfesti þetta í samtali við fréttastofu.

Sveinn Björnsson, forstjóri Novator Properties, sagði einnig í samtali við fréttastofu að bréf Commerzbank eru svokölluð B-bréf sem þýðir að bankinn munu ekki hafa áhrif rekstur félagsins.