Bregðast þarf við strax svo ekki fari illa í Landmannalaugum

Árið 2011 hafði umferð um Fjallabaksleið nyrðri við Frostastaðavatn nær fimmfaldast á um 15 árum og sumarið 2000 heimsóttu um 60 þúsund manns Landmannalaugar en 2011 voru gestir þar rúmlega 120 þúsund talsins. Þetta þýðir að fjöldi ferðamanna þar tvöfaldaðist á um áratug og enn fjölgar.

Fegurðin í Landmannalaugum lætur sennilega engan ósnortinn enda er þetta vinsælasti áfangastaður ferðamanna á hálendinu. Ferðamönnum hefur hins vegar fjölgað gríðarlega og landið lætur á sjá; raunar svo mikið að Landamannalaugar eru á rauðum lista Umhverfisstofnunar yfir svæði sem eru undir svo miklu álagi að bregðast þarf við, strax.

„Þetta þýðir að á svæðið hefur verið gengið og það þarf að bregðast við til að ekki fari verulega illa,“ segir Ingibjörg Eiríksdóttir, sérfræðingur hjá Umhverfisstofnun og svæðalandvörður á Suðurlandi. „Hér mæðir ekki síður á félagslega en náttúrufarslega og það er verið að skoða leiðir til stýringar.

Vinna við varnaráætlun fyrir friðlandið er hafin og Ingibjörg segir beðið eftir svæðisskipulagi svo hægt sé að vinna að varanlegum lausnum.

„Í bili eru sjálfboðaliðar Umhverfisstofnunar að störfum við að hlúa að svæðinu; lagfæra merkingar og göngustíga og ýmsa innviði til stýringar ferðamanna,“ segir Ingibjörg.

Óháðir aðilar gera nú úttekt á þeim hluta Laugavegarins sem liggur innan friðlands og nýstofnað starf heilsárslandvarðar, sem Ingibjörg sinnir, hefur bætt utanumhald um svæðið. Hún segir kjarna málsins vera að fólk sæki í hálendið vegna kyrrðarinnar en svo sé það markaðssett á þeim forsendum, sem fjölgi ferðamönnum, sem skerði svo eðlilega kyrrðina.

„Þannig að þetta er línudans sem er vandi að stíga, en mikil áskorun og spennandi,“ segir hún að lokum.

Stöð 2 og Vísir munu á næstunni fjalla meira um Landmannalaugar og nágrenni; meðal annars hugsanlega færslu þjónustunnar sem nú er í Landmannalaugum, út fyrir svæðið.