Björgunarafrek Guðmundar: „Þessi saga kom mér ekki á óvart“

„Þetta var alveg í hans stíl," segir rithöfundurinn Þórunn Hrefna Sigurjónsdóttir sem skrifaði ævisögu Guðmundar Sesars Magnússonar fyrir nokkrum árum, en hann lést í sjóslysi við Skrúð nálægt Fáskrúðsfirði þann 16. desember.

Predikunin, sem séra Jóna Hrönn Bolladóttir flutti á aðfangadag í Garðakirkju, hefur vakið gríðarlega athygli en þar segir hún frá ótrúlegri lífsbjörg tengdasonar Guðmundar, Ívars Smára Guðmundssonar.

Í predikuninni segir:

„Þar sem þeir héldu hvor í annars hægri hönd með olíubrákað sjóvatnið undir höku en með þeirri vinstri héldu þeir við hnakkann hvor á öðrum.

„Og ég sem hlakkaði til að eiga fyrstu jólin með syni mínum og konunni." mælti Ívar.

Þá horfði Sesar inn í augu hans í myrkrinu og sagði:

„Þá skaltu líka lifa! Þú getur komist niður gatið, inn í stýrishúsið og út!" Við svo búið setti hann hönd ofan á hvirfil tengdasonar síns og ýtti honum af afli niður í átt að útgönguleiðinni."

Fyrir vikið komst Ívar Smári út úr bátnum sem hafði hvolft eftir að brot kom á hann. Voru þeir fastir í öfugu brakinu og í fyrstu virtist ekkert bíða þeirra nema dauðinn. Guðmundur Sesar ýtti þá tengdasyni sínum út og það varð honum til lífs. Sjálfur lét hann lífið.

„þessi saga kom mér ekki á óvart," segir Þórunn Hrefna en hún skrifaði einstaka sögu Guðmundar og baráttu hans við að endurheimta dóttur sína úr klóm handrukkara. Bókin heitir Sigur í hörðum heimi.

Þar segir frá harðri baráttu Guðmundar við handrukkara og böl fíkniefnaheimsins þegar hann freistaðist til þess að bjarga dóttur sinni. Innsýn hans í undirheimana var hrollvekjandi en um leið mögnuð baráttusaga þar sem hann hafði að lokum sigur. Hann frelsaði dóttur sína sem nú á kornungt barn með Ívari Smára.

Þórunn segir að hann hafi misst íbúðina sína baráttunni en bókin vakti gríðarlega athygli á sínum tíma.

Þórunn segir Guðmund Sesar hafa verið magnaðan mann. Hann hafi verið hamhleypa til verka og það hafi verið sérstaklega gott að vinna bókina með honum.

„Hann var ekta maður," Segir Þórunn Hrefna þegar hún reynir að lýsa honum. Hún segir að hann hafi verið greindur þó að hann hafi hætt námi aðeins fimmtán ára gamall. Hann var gríðarlega einbeittur og góður vinur vina sinna.

Hún segist síðast hafa hitt Guðmund Sesar í búsáhaldabyltingunni í janúar en svo hafi hún ekki hitt hann.

Í predikun Jónu Hrannar hefur hún eftir konu Guðmundar, að sjálfur hafi Guðmundur ekki verið neinn dýrlingur. „Við höfum nú frekar brotna geislabauga prestur minn," sagði hún við Jónu Hrönn þegar þær ræddu saman um innihald predikunarinnar.

„Það er einmitt það sem gerir þessa sögu svo magnaða," segir Þórunn Hrefna um Guðmund Sesar en hann verður jarðsunginn í vikunni.