Barnaverndarstofa vottar verklagsreglur Vottanna

Verklagsreglur Votta Jehóva á Íslandi um meðferð kynferðisbrotamála sem upp kunna að koma innan safnaðarins eru í lagi, segir Bragi Guðbrandsson, forstöðumaður Barnaverndarstofu.

Hann átti fund með forsvarsmönnum Votta Jehóva eftir hádegi í dag vegna umfjöllunar Fréttatímans og RÚV um kynferðisbrotamál innan Votta Jehóva. „Okkur fannst rétt að glöggva okkur á því hvort þeir hefðu sett sér verklagsreglur varðandi tilkynningar á svona málum og i hvaða farveg þeim var þá beint," segir Bragi í samtali við Vísi. Hann segir að forstöðumenn safnaðarins hafi lagt fram gögn á fundinum, verklagsreglur og annað, sem þeir hafi kynnt í sínum safnaðardeildum.

Eitt mál síðastliðinn áratug

„Þeir viðurkenndu hvernig bregðast bæri við þegar að grunur léki á um að barn sætti ofbeldi eða vanrækslu af einhverju tagi. Okkur sýnist að þessar leiðbeiningar séu í fullu samræmi við ákvæði barnaverndalaga. Þar er lögð alveg sérstök áhersla á tilkynningaskyldu til barnaverndanefnda," segir Bragi. Forsvarsmenn safnaðarins hafi fullvissað sig um að eftir þessu væri farið. „Það kom nú reyndar lika fram hjá þeim að þetta væru mjög fá mál sem hefðu borist til þeirra á síðustu tíu árum," segir Bragi. Einungis væri vitað um eitt mál á síðastliðnum áratug. Bragi sagði að forsvarsmenn safnaðarins hefðu lagt áherslu eir lögðu áherslu á að í meðferð kynferðisbrotamála yrði farið eftir settum reglum. „Þannig að Barnaverndarstofa er mjög sátt við þeirra viðbrögð og skýringar," segir Bragi.

Bragi segir að ekki séu uppi áform um að funda með fleiri trúfélögum. Tilefnið með fundinum við forsvarsmenn Votta Jehóva hafi verið að það mátti skilja af viðbrögðum í fjölmiðlum að forsvarsmenn safnaðarins skoðuðu mál sín sjálfir áður en að þau væru tilkynnt og taka sjálfir ákvarðanir um kæru eftir atvikum. „En samræða okkar leiddi það í ljós að það var alls ekki það sem þeir áttu við," segir Bragi. Verklagsreglur safnaðarins séu í raun hliðstæðar þeim verklagsreglum sem grunnskólar og heilbrigðisstofnanir hafi sett sér.

Samfélagið meðvitað um skyldu sína

Bragi segir að það það gleðji sig að samfélagið skuli vera orðið svo vel vakandi um sínar tilkynningaskyldur í kynferðisbrotamálum, líkt og fram hafi komið í samræðum við forsvarsmenn Votta Jehóva. „Það kom á óvart hvað þeir höfðu gert þetta vel í sínum ranni. Ég skal alveg játa það að ég vissi ekkert hverju ég átti von á," segir Bragi.