Slysavarnafélagið Landsbjörg fékk Samfélagsverðlaun Fréttablaðsins

Slysavarnafélagið Landsbjörg hlaut Samfélagsverðlaun Fréttablaðsins í ár. Þau voru afhent við hátíðlega athöfn í Þjóðmenningarhúsinu í dag. Forseti Íslands, Ólafur Ragnar Grímsson, afhenti verðlaunin. Þetta er í fimmta sinn sem Fréttablaðið veitir Samfélagsverðlaunin en þau eru veitt í fjórum flokkum auk heiðursverðlauna.

Slysavarnafélagið Landsbjörg eru landssamtök björgunarsveita og slysavarnadeilda á Íslandi. Starfsemin miðar að því að koma í veg fyrir slys og bjarga mannslífum og verðmætum. Í þeim tilgangi er öflugur hópur sjálfboðaliða til taks ef út af bregður, á nóttu sem degi, allt árið um kring. Slysavarnafélagið Landsbjörg hlýtur verðlaunin fyrir óeigingjarnt björgunarstarf sem byggir á framlagi sjálfboðaliða og fer fram bæði hér heima og erlendis.

Forseti Íslands, Ólafur Ragnar Grímsson, afhenti fulltrúum Slysavarnafélagsins Landsbjargar verðlaunin. Ari Edwald, forstjóri 365, afhenti þeim síðan verðlaunafé að upphæð ein milljón króna.

Aðrir sem voru útnefndir til Samfélagsverðlaunanna:

Bergmál

Hjálparstarf kirkjunnar

Kvenfélagasamband Íslands

Vímulaus æska

Til Samfélagsverðlaunanna koma til greina félagasamtök sem hafa unnið framúrskarandi mannúðar- eða náttúruverndarstarf; samtök sem hafa með starfi sínu lagt sitt af mörkum til að gera samfélagið betra fyrir okkur öll.

Hvunndagshetja

Hvunndagshetja ársins 2008 er André Bachmann. André er mikill gleðigjafi og hefur gengist fyrir jólaskemmtunum fyrir fatlaða og fær verðlaun fyrir þá þrautseigju að viðhalda verkefninu í hátt á þriðja áratug.

Aðrir sem voru tilnefndir í þessum flokki:

Embla Ágústsdóttir

Jakob Einar Jakobsson

Jóna Berta Jónsdóttir

Lovísa Christiansen

Verðlaunin eru veitt einstaklingi sem hefur sýnt einstaka óeigingirni eða hugrekki annaðhvort við vinnu að ákveðnum málaflokki eða í tengslum við einn atburð.

Frá kynslóð til kynslóðar

Verðlaun í þessum flokki fær Gauraflokkurinn í Vatnaskógi fyrir frumkvæði og óeigingjarnt starf við að bjóða drengjum með ADHD upp á sumarbúðadvöl.

Aðrir tilnefndir í þessum flokki:

Hallfríður Ólafsdóttir

Laila Margrét Arnþórsdóttir

Rauði kross Íslands og Öldrunarráð

Tónstofa Valgerðar

Í þessum flokki koma allir þeir til greina sem hafa unnið eftirtektarvert starf í þágu menntunar, uppfræðslu eða umönnunar þeirrar kynslóðar sem er að vaxa úr grasi, jafnt einstaklingar sem samtök eða stofnanir.

Til atlögu gegn fordómumHugarafl hlýtur verðlaunin í þessum flokki fyrir fyrir að vinna að bótum á geðheilbrigðiskerfinu með fræðslustarfi og notendasýn að leiðarljósi.

Aðrir tilnefndir:

Adrenalín gegn rasisma

Kristín Vilhjálmsdóttir/Borgarbókasafn

Páll Óskar Hjálmtýsson

Þórdís Elva Þorvaldsdóttir

Verðlaun í þessum flokki eru veitt einstaklingi eða félagasamtökum sem hafa unnið ötullega að því að eyða fordómum í samfélaginu.

Heiðursverðlaun

Heiðursverðlaun Samfélagsverðlauna Fréttablaðsins hlýtur Jón Böðvarsson fyrir að miðla Íslendingasögunum til þúsunda Íslendinga, bæði sem framhaldsskólakennari og síðar á fjölsóttum námskeiðum í Endurmenntun Háskólans. Hæfileiki Jóns til að miðla er einstakur og óhætt er að segja að sagnaheimurinn spretti lifandi fram í meðförum Jóns.