Börn með fæðingargalla búa við misrétti í læknisþjónustu

Reglugerðir sem heilbrigðisráðherra setti um áramót og fjalla um endurgreiðslur vegna tannréttinga og aðgerða í gómi barna með skarð í vör og gómi hafa valdið foreldrum barnanna miklum vonbrigðum.

Árni Stefánsson stjórnarmaður í félaginu Breið bros, samtökum aðstandenda barna með skarð í vör og/eða gómi, og faðir tveggja ára drengs með skarð í vör og gómi, bendir á að nýjar reglur takmarki tíma til tannréttinga barnanna við þrjú ár. Það sé of stuttur tími í mörgum tilvikum. Eins hafi verið sett of lágt þak á endurgreiðslur vegna þess hluta meðferðarinnar sem lýtur að því að víkka góm og gera hann tilbúinn fyrir bein­ígræðslu sem framkvæmd er við átta til tíu ára aldur barna.

Börn sem fæðast með skarð í vör og góm gangast undir margs konar aðgerðir. Svo dæmi séu tekin þá er skarðinu lokað þegar þau eru mjög ung og er það gert af lýtalæknum inni á spítölum. Sá hluti meðferðarinnar er þeim að kostnaðarlausu. Vegna þess að tann- og tannréttingalæknar eru ekki hluti af sjúkratryggingakerfi landsins greiða foreldrar þann hluta meðferðar barna sinna úr eigin vasa en hafa fengið hluta kostnaðarins endurgreiddan.

Fram til síðustu áramóta miðaðist endurgreiðslan við gjaldskrá heilbrigðisráðherra sem sett var 1994 og hefur ekki verið uppfærð í samræmi við verðlagsbreytingar á tímabilinu. Þess má geta að tannlæknar eru einnig afar óánægðir með reglugerðirnar, til að mynda þann hluta sem kveður á um að þeir geri kostnaðaráætlun vegna tannréttinga barnanna áður en þær hefjast og að endurgreiðslur miðist við þá upphæð.

Árni segir dæmin sanna að ekki sé hægt að segja til um það nákvæmlega fyrirfram hversu miklar aðgerðir börnin þurfi.

Hann segir hins vegar að það sé óþolandi fyrir aðstandendur að dragast inn í deilur tannréttingalækna og ríkisins. „Þessar deilur hafa tekið mörg ár og á meðan koma gluggaumslögin til foreldranna," segir Árni og undir þetta sjónarmið taka fleiri foreldrar sem Fréttablaðið hefur rætt við. Kynning á reglugerðunum á fundi hjá Sjúkratryggingum Íslands hafi til að mynda leiðst út í umræður um gjaldskrár tannréttingalækna. „Ég á nóg með að hugsa um börnin mín og gæta hagsmuna þeirra og á ekki að þurfa að hugsa um stríðið á milli tannlækna og Sjúkratrygginga Íslands," sagði foreldri sem ekki vill láta nafns síns getið.

Árni segir eðlilegt að jafnræðis væri gætt og heilbrigðiskerfið greiddi fyrir alla læknismeðferð barnanna, þar með talið tannréttingar og talþjálfun, rétt eins og læknismeðferð barna með annars konar fæðingargalla er greidd af íslenska ríkinu.

sigridur@frettabladid.is