Tjónið vegna galla í stálvirkinu sem heldur glervegg við suðurhlið Hörpunnar hleypur á hundruðum milljóna króna. Taka þarf niður hluta af stálvirkinu þar sem prófanir sýndu að veggurinn þolir ekki mesta vindálag sem búast má við á næstu árum. Gallann má til mistaka kínversks undirverktaka Íslenskra aðalverktaka. Kínverjarnir hafa fallist á að bera tjónið.
Íslenskir aðalverktakar hafa krafist þess af framleiðanda glerhjúpsins að stálvirkið verði tekið niður og nýtt sett upp.
Tjónið hleypur á hundruðum milljóna króna, að sögn Sigurðar Ragnarssonar, framkvæmdastjóra hjá ÍAV, sem hefur yfirumsjón með byggingu hússins. Sigurður baðst undan viðtali, en sagði í samtali við fréttastofu að vandamálið fælist í hornum á stálkubbunum.
Í marsmánuði 2010 uppgötvaðist sprunga í horni á einum kubbnum. Sérfræðingar ÍAV hófu þegar rannsókn og í ljós kom í prófunum að efnisinnihald stálkubbanna var ekki eins og það átti að vera.
Sigurður sagði að prófanir hefðu leitt í ljós að hornin hefðu ekki verið meðhöndluð rétt eftir að þau voru steypt í mót, en burðarvirki af þessu tagi þurfi að hafa ákveðna seiglu sem stálkubbarnir hafi ekki. Sigurður sagði að vegna öryggissjónarmiða væri því ekki forsvaranlegt að hafa þá á húsinu.
Kínverska verktakafyrirtækið Lingyun sá um uppsetningu glerhjúpsins sem undirverktaki ÍAV og hefur fyrirtækið fallist á að greiða fyrir uppsetningu á nýjum vegg. Að sögn Sigurðar mun þetta ekki seinka opnun Hörpunnar en stefnt er að því að vígja húsið í maí á næsta ári.
Sjá má stálkubbana sem um ræðir og nýjar myndir af Hörpunni í myndskeiðinu með fréttinni.
