Ökumenn án skírteina sektaðir

Á annan tug ökumanna sem lögreglan á höfuðborgarsvæðinu stöðvaði í umdæminu um helgina höfðu ekki ökuskírteini meðferðis. Einhverjir til viðbótar höfðu ekki hirt um að endurnýja það.

Að sögn lögreglunnar er þetta kæruleysi ökumanna ekki nýtt af nálinni. Lögreglan segir að sem fyrr séu alltaf nokkrir sem aka án réttinda en þrír ökumenn voru teknir fyrir þær sakir um helgina.

Þá stöðvaði lögreglan för tveggja ökumanna á sama tímabili en þeir hafa aldrei öðlast ökuréttindi. Ekki þarf að fara mörgum orðum um slíkt ábyrgðarleysi.