Náðu sýnum skammt frá gossprungunni

„Hraunkeilurnar sem spýttust hátt upp í loft voru gríðarlega tilkomumiklar,“ segir Þór Kjartansson, félagi í flugbjörgunarsveitinni í Reykjavík, sem var í hópi fjögurra manna sem fóru á vélsleðum að hraunbreiðunni við Fimmvörðuháls í dag. Þar náðu þeir meðal annars gjóskusýnum sem þeir síðar afhentu vísindamönnum. „Við höfum verið nokkur hundruð metra frá sprungunni.“

Annar hópur varð frá að hverfa útaf vitlausu veðri. Þar á ferðinni voru vísindamenn og félagar í flugbjörgunarsveitinni á Hellu.

„Það voru mjög þægilegar og öruggar aðstæður til að koma að gossvæðinu úr austri. Við komum yfir Mýrdalsjökul og niður á Fimmvörðuháls. Vindurinn stóð mjög stífur úr norðaustri og feykti allri gjósku frá okkur," segir Þór. Þar gátu fjórmenningarnir aðhafst áður en veðrið varð of slæmt. „Þarna eru hólar og hæðir þannig að við komumst mjög nálægt til að taka gjóskusýni án þess að fara of nálægt."

Því næst héldu mennirnir til móts við hinn hópinn. „Við fórum til baka til móts við flugbjörgunarsveitina frá Hellu. Jarðfræðingarnir voru í snjóbíl hjá þeim. Þar fórum yfir aðstæðurnar með þeim, sýndum þeim myndir og afhendum sýnin sem við tókum," segir Þór.

Hann segir að gossprungan liggi þvert yfir gönguleiðina um Fimmvörðuháls. „Stikurnar á gönguleiðinni ganga beint inn í nýja hraunið."