Steinunn Valdís: Minntist aldrei á Geira í Goldfinger

„Líklega þarf nú að nefna fólk á nafn til að það geti kært aðra fyrir meiðyrði," segir Steinunn Valdís Óskarsdóttir, formaður allsherjarnefndar Alþingis, en Ásgeir Davíðsson, eigandi nektardansstaðarins Goldfinger, íhugar að kæra hana eftir að hún lét þau orð falla að nektardansstaðir hýstu oft mansal og skipulagða glæpastarfsemi.

Nokkur hundruð ungar erlendar stúlkur koma hingað til lands á hverju ári til að sýna nektardans. Allsherjarnefnd Alþingis samþykkti í vikunni frumvarp þar sem lagt er til að nektarsýningar í atvinnuskyni verði bannaðar.

Steinunn Valdís sagði í fréttum Stöðvar 2 að ekki væri vilji til að hafa þessa starfsemi hér á landi þar sem vitað væri að hún hefði í för með sér mansal og skipulagðra glæpastarfsemi.

Ásgeir Davíðsson, jafnan kallaður Geiri og kenndur við Goldfinger, segir í viðtali við DV í dag að hann hljóti að kæra þessi ummæli þar sem hann telji að um meiðyrði hafi verið að ræða Hann hafi þegar rætt við lögmann vegna málsins enda sé hann afar ósáttur við að vera bendlaður við alþjóðlega glæpastarfsemi.

Í samtali við fréttastofu í dag segir Steinunn Valdís að fullyrðingar sínar um tengsl nektardansstaða við skipulagða glæpi séu byggðar á fjölda erlendra rannsókna og skýrslna sem flestum ætti að vera í lófa lagið að kynna sér.

Telji Ásgeir að brotið hafi verið á sér eigi hann að vitanlega að leita réttar síns, til dæmis með því að fara í mál. Hún telji hins vegar að til þess þurfi viðkomandi að hafa verið nefndur á nafn. Ásgeir hafi hún aldrei nefnt í tengslum við þessa starfsemi.