Hjúkrunarheimili Hrafnistu vígt í Kópavogi

Nýtt hjúkrunarheimili Hrafnistu verður vígt við Boðaþing í Kópavogi á morgun. Rúm átta ár eru síðan nýtt og sérhannað hjúkrunarheimili tók til starfa á höfuðborgarsvæðinu.

Hrafnista í Kópavogi verður rekin eftir nýrri hugmyndafræði í öldrunarþjónustu sem ekki hefur verið reynd áður hér á landi. Hún felur í sér að sameina bestu kosti sjálfstæðrar búsetu við það öryggi sem hjúkrunarheimilin hafa uppá að bjóða, að fram kemur í fréttatilkynningu frá Sjómannadagsráði Reykjavíkur og Hafnarfjarðar.

Hugmyndafræðin byggir á þátttöku íbúanna sjálfra og aðstandenda þeirra í hinu daglega lífi á heimilinu þar sem starfsfólk og íbúar vinna saman að því að skapa hlýlegt og virkt samfélag. Öll hönnun húsnæðis tekur mið af þessari hugmyndafræði.

Fyrri áfangi af tveimur

Í kjölfar vígslunnar á morgun hefst rekstur í fyrri áfanga byggingar Hrafnistu við Boðaþing með rýmum fyrir 44 einstaklinga. Alls er gert ráð fyrir rýmum fyrir 88 aldraða á hjúkrunarheimilinu og verður seinni áfanginn tekinn í notkun á næstu árum. Við upphaf rekstrarins munu á bilinu 40 til 50 manns starfa á hjúkrunarheimilinu.

Félags- og tryggingamálaráðuneytið og Kópavogsbær hafa byggt hjúkrunarheimilið og falið reksturinn Sjómannadagsráði, eiganda Hrafnistuheimilanna.

Hrafnistukórinn flytur nokkur lög

Við vígsluathöfnina á morgun flytja stutt ávörp félags- og tryggingamálaráðherra, Árni Páll Árnason, bæjarstjóri Kópavogsbæjar, Gunnsteinn Sigurðsson, og formaður Sjómannadagsráðs, Guðmundur Hallvarðsson. Að lokinni blessun sr. Guðmundar Karls Brynjarssonar, flytur Hrafnistukórinn nokkur lög.