Þingmenn Samfylkingarinnar ósammála um ECA Programs

Steinunn Valdís Óskarsdóttir, þingmaður Samfylkingarinnar, segist ekki vera sátt við hugmyndir um að fyrirtækið ECA Programs hefji starfsemi á Íslandi. Hugmyndir fyrirtækisins snúast um að leigja þjóðum innan NATO samstarfsins gamlar rússneskar herþotur til heræfinga.

Steinunn Valdís segir að málið hafi ekki verið rætt í þingflokki Samfylkingarinnar. Eftir því sem hún hafi kynnt sér starfsemi fyrirtækisins og skoðað heimasíðu þess geti hún ekki séð annað en að um einkaher sé að ræða.

Steinunn Valdís segist telja að hugmyndir um að fá fyrirtækið til Íslands stríði gegn því sem hún telji vera rétt. Hún bendir á að hún hafi nýlega lagt fram þingsályktunartillögu ásamt Ögmundi Jónassyni um að kannaður verði aðdragandinn að því að Ísland studdi innrásina í Írak árið 2003. Hún sé ekki að bera þessi tvö mál saman. Hins vegar megi af þessu ráða að hún telji að Ísland eigi ekki að tengja sig við starfsemi af því tagi sem þarna er verið að ræða um.

Björgvin Sigurðsson og Róbert Marshall, þingmenn Samfylkingarinnar, hafa báðir sagst vera fylgjandi því að ECA Programs hefji starfsemi hér á landi.