Sagnfræðigrúskarar fá athvarf á Skagaströnd

Háskóli Íslands er kominn á Skagaströnd og búinn að stofna þar rannsóknarsetur í sagnfræði þar sem fræðimenn fá næði til að kryfja söguna.

Kaupfélagshúsið þótti veglegasta húsið á Skagaströnd þegar það var byggt árið 1930. Eftir að verslunarekstri var hætt fyrir tuttugu árum grotnaði húsið niður en því hefur nú verið fengið nýtt hlutverk; að hýsa fræðasetur, það áttunda sem Háskóli Íslands setur upp á landsbyggðinni.

Lára Magnúsardóttir, forstöðumaður Fræðaseturs Háskóla Íslands á Norðurlandi vestra, segir að ólíkt hinum verði ekki unnið að rannsóknum á náttúrunni eða lífríkinu heldur verði þetta rannsóknasetur í sagnfræði.

Þarna munu grúskarar fá athvarf. Aðstaða verður fyrir fræðimenn sem vilja draga sig út úr skarkala borgarinnar og fá næði. Einnig verður aðstaða til að halda fyrirlestra, námskeið og ráðstefnur, að sögn Láru.

"Skagaströnd er svolítið skemmtilegur staður og kemur mjög á óvart, því það er eitthvað svo mikil dýnamik hérna," segir hún.

Sjálf er Lára með doktorsgráðu í sagnfræði, - doktorsritgerðin fjallaði um bannfæringu kirkjunnar á miðöldum, - en hún þekkti ekkert til Skagastrandar, kom þangað í fyrsta sinn í sumar, beint úr 101 Reykjavík.

"Ég er svona manneskja sem hefur fundist það vera tómt vesen að fara austur fyrir lækinn. En þetta er voða gaman," segir hún.