Einar K: Varla trúir Jóhanna eigin vitleysu

Einar K. Guðfinnsson, þingmaður Sjálfstæðisflokks, er allt annað en ánægður með þá yfirlýsingu forsætisráðherra að Sjálfstæðisflokkurinn hefði engan áhuga á að koma í veg fyrir undanskot á skatti á undanförnum árum. Hann segir að flokkurinn vilji ekki standa vörð um skattsvik.

Rannsókn nefndar á vegum fjármálaráðuneytisins hefur leitt í ljós að hundruðum milljarða hefur verið velt í bankakerfinu án þess að þau viðskipti væru gefin upp eða greiddur af þeim skattur.

Að loknum ríkisstjórnarfundi í gær sagði Jóhanna Sigurðardóttir, forsætisráðherra, að Sjálfstæðisflokkurinn hefði ekki haft áhuga á að koma í veg fyrir undanskot á skatti. Á undanförnum árum hefði tvisvar sinnum verið gerð úttekt á skattaumhverfi bankanna á meðan Sjálfstæðiflokkurinn hefði stjórnað fjármálaráðuneytinu. Jóhanna sagði að flokkurinn hefði ekkert gert með tillögurnar.

„Vill Sjálfstæðisflokkurinn standa vörð um skattsvikin?" spyr Einar í pistli á heimasíðu sinni. Hann segir að varla trúi Jóhanna vitleysunni úr sjálfri sér.

How low can you go?

„Það er skoðun forsætisráðherrans að til sé stjórnmálaflokkur sem vilji sjá í gegn um fingur sér gagnvart skattsvikurum. Sé eins konar skjól fyrir skattsvikara í landinu. Er nú hægt að rata niður á mikið lægra plan. Eða eins og unga fólkið slettir stundum; how low can you go?" segir Einar.

Hann vill að Jóhanna líti sér nær. „Ríkisstjórnin undir forsæti hennar hefur linnulaust breytt skattkerfinu og gert það flóknara. Og það er byrjunarlexía í skattamálum að eftir því sem skattkerfin verða flóknari því líklegri verði skattundanskotin," segir Einar í pistlinum sem hægt er að lesa hér.