Skagaströnd græðir á atvinnuleysinu

Skagaströnd er sennilega eina byggðarlagið á Íslandi sem græðir á atvinnuleysi. Eftir því sem fleiri missa vinnuna, því fleiri störf skapast á Skagaströnd.

Þar sem áður voru höfuðstöðvar Skagstrendings er nú skrifstofan sem greiðir út bæturnar. Viðskiptavinirnir eru allir þeir sem eru atvinnulausir á Íslandi. Þarna vex starfseminni sem sagt fiskur um hrygg, Skagaströnd græðir á atvinnuleysinu, viðurkennir Líney Árnadóttir, forstöðukona Vinnumálastofnunar á Norðurlandi vestra. Starfsmönnum hafi vegna þess fjölgað úr 7 upp í 24.

Skagstrendingur var á sínum tíma eitt öflugasta útgerðarfyrirtæki landsins. Þá var milljörðunum mokað inn í samfélagið. Nú hefur hlutskipti hússins snúist við. Nú er milljörðunum mokað út. Fjárhæðirnir sem fara út um hver mánaðamót eru orðnar sláandi, tveir milljarðar um síðustu mánaðamót.

Eftir að fiskvinnsla lagðist af í sjávarplássinu er þetta orðinn stærsti vinnustaðurinn, og ígildi álvers, segir Sigríður Gestsdóttir sem áður vann hjá Skagstrendingi. Ef þetta væri ekki? "Ætli ég væri ekki bara á bótum. Eða farin í burtu," svarar hún.

Starfsmenn eru flestir frá Skagaströnd en einnig frá Blönduósi og nærsveitum, þó aðeins tveir karlmenn. Líney segir þetta vissulega störf sem henti konum vel en í minni sveitarfélögum á landsbyggðinni vanti oft góð störf fyrir konur. Þessvegna séu störf hjá opinberum stofnunum eftirsóknarverð.