Ég veit hvar bin Laden er

Íslenska heimildarmyndin Feathered Cocaine verður frumsýnd á kvikmynda-hátíð Roberts De Niro, Tribeca, í lok apríl í New York. Kvikmyndagerðarmennirnir voru ansi nálægt því að hitta alræmdasta hryðjuverkamann heims.

„Við vorum einu handabandi frá honum," segir Örn Marinó Arnarson kvikmyndagerðarmaður í samtali við Fréttablaðið. Hann segist vita hvar í heiminum Osama Bin Laden er og er sannfærður um að bandarísk yfirvöld hafi ekki nokkurn áhuga á að ná honum. „Þeir hafa sömu upplýsingar og við og ég veit allavega hvar hann hefur haldið sig undanfarin ár," segir Örn en þeir tóku meðal annars viðtal við mann í myndinni sem var að veiða með Bin Laden eftir að hann varð mest eftirlýsti maður heims. Örn ásamt samstarfsfélaga sínum, Þorkatli Harðarsyni, frumsýnir heimildarmyndina Feathered Cocaine á kvikmyndahátíðinni Tribeca í New York sem hefst 21. apríl og stendur til 2. maí. Hátíðin var stofnuð af stórleikaranum Robert De Niro eftir árásirnar á Tvíburaturnanna 2001. Viðeigandi, segir Örn.

Að sögn kvikmyndagerðarmannsins stóð upphaflega til að gera litla rómantíska heimildarmynd um fálkaveiðar og sögu þeirra. „Steingrímur heitinn Eyfjörð hafði sagt okkur helling af fálkasögum og Friðrik Þór líka. En þegar við fórum að leita eftir leyfum og öðru slíku var okkur hafnað undarlega oft og það gaf okkur hugboð um að víða væri pottur brotinn í þessum málum." Örn og Þorkell þeyttust heimshornanna á milli, dvöldust í ríkjum Sovétríkjanna sálugu en lönd á borð við Kasakstan og Tadsjikistan hafa verið vinsæl fálkalönd eftir að járntjaldið hrundi með skelfilegum afleiðingum fyrir fálkastofninn. Þeir fóru auk þess til landanna við Persaflóa, Svíþjóðar, Bandaríkjanna og fjölda annarra landa. „Þetta hefur því verið mikið flakk á okkur."

Aðalpersóna myndarinnar er fálkafíkillinn Alan Howell Parrot sem er hálfgerð goðsögn í þessum bransa. „Þetta er maður sem hafði lifibrauð sitt af því að selja fálka til voldugra manna við Persaflóa, manna eins og keisarans í Írans og olíufursta. Hann sneri síðan baki við þessari iðn og hefur barist hart gegn henni enda er markvisst verið að útrýma þessum stofni með þessum markaði," útskýrir Örn. Hann bætir því við að þetta sé ógnarstór bransi þar sem topparnir, prinsarnir og furstarnir, eru verstir. „Í gamla daga var það þannig að menn notuðu fálkann til að veiða sér til matar. Þetta var fyrir daga olíunnar. Núna er þetta bara elítusport þar sem menn lenda á Boeing 747-þotum úti í miðri eyðimörkinni, keyra um á sérsmíðuðum drekum og láta fálkann veiða."

Örn segir eflaust hafa verið léttara mál að gera mynd um mafíuna en fálkasölu því menn voru þöglir sem gröfin um málið. „Það var enginn reiðubúinn til að tjá sig, enginn vildi í raun tala við okkur og við komumst aldrei nálægt þessum furstum," segir Örn sem verður viðstaddur frumsýninguna í New York ásamt Þorkatli sem búsettur er í Brooklyn. „Annars er rétt að taka fram að við tileinkum þessa mynd Steingrími og minningu hans," segir Örn en Steingrímur samdi tónlistina við myndina.
freyrgigja@frettabladid.is