Tvenn verðlaun til Fréttablaðsins

Anton Brink Hansen og Valgarður Gíslason, ljósmyndarar Fréttablaðsins, hlutu á laugardaginn verðlaun fyrir bestu ljósmyndir ársins í flokki íþróttamynda og daglegs lífs í blaðaljósmyndarakeppninni Myndir ársins. Myndirnar voru báðar birtar í helgarblaði Fréttablaðsins. Rakel Ósk Sigurðardóttir, ljósmyndari DV, hlaut verðlaun fyrir mynd ársins.

Verðlaun í blaðaljósmyndarakeppninni voru afhent um leið og blaðamannaverðlaun Blaðamannafélags Íslands við athöfn í Gerðarsafni í Kópavogi. Blaðamannaverðlaunin hlaut Jóhann Hauksson, blaðamaður á DV, fyrir fréttaskýringar um stjórnarskipti og þjóðfélagsmál. Þórður Snær Júlíusson, Viðskiptablaðinu, fékk verðlaun fyrir rannsóknarblaðamennsku en hann skrifaði meðal annars um aflandsfélög, skattaskjól og einkavæðingu bankanna.

Verðlaun fyrir bestu umfjöllun ársins hlaut Lóa Pind Aldísardóttir á Stöð 2, fyrir fréttaskýringar um ýmis flókin mál, svo sem fjármál heimilanna og aðild Íslands að ESB. Svavar Hávarðsson, blaðamaður Fréttablaðsins, var tilnefndur til verðlauna fyrir bestu umfjöllun ársins fyrir fréttaskýringaflokk um endurskoðun stjórnarskrárinnar.- kg