Segir sólbaðsfíkn dauðans alvöru

Hundruð fólks þjást af sólbaðsfíkn á Íslandi og leita stöðugt í ljósabekki og sólböð. Fjöldi manns hefur leitað sér aðstoðar vegna fíknarinnar að sögn formanns Tanorexíu-félags Íslands, en í því félagi reynir fólk að miðla þekkingu sinni og reynslu af sólbaðsfíkn.

Samkvæmt upplýsingum frá Krabbameinsskránni greinast að meðaltali 50 manns á ári með sortuæxli í húð. Þá sýna gögn frá Landlækni að árlega deyja um níu manns af völdum þeirra.

Ómar Raiss, formaður Tanorexíu-félags Íslands, segir fíknina dauðans alvöru.

Hann segir sína fíkn hafa fyrst komið fram í kjölfar skammdegisþunglyndis. Hann hafi leitað í hitann og birtuna í þjáningum sínum. Það hafi svo undið upp á sig og á endanum hafi hann svo illa ráðið við fíkn sína að hann var farinn að laumast úr vinnu til að komast úr ljós.

Þá gætti hann þess að fara ekki alltaf á sömu stofuna svo ekki kæmist upp hve oft hann notaði ljósabekkinn.

Hann segir að foreldrar verði að vera meðvitaðir um þá hættu sem þeir geta kallað yfir börn sín með því að leyfa þeim að fara snemma á sólbaðstofur.

Húðlæknir segir, ótímabæra öldrun húðarinnar og hættu á húðkrabbameinum ekki eina fylgifisk ljósabekkjanotkunar. Rannsóknir hafi sýnt að bekkirnir séu iðulega gróðrarstía baktería og vitað sé til þess að í þeim hafi fólk smitast af kláðamaur.

Tíðni sortuæxla sé orðin mesta hér á landi. Það þurfi enga skarpskyggni til að átta sig á því að það vandamál sé ekki tilkomið vegna íslenska sólskinsins heldur mikill ljósabekkjanotkun. Nú sé svo komið að fleiri fái hér sortuæxli en í löndum við miðbaug.

Fyrir áhugasama er hægt að kynna sér málefnið betur hér.