Pálmi sér eftir mannorðinu - voru í typpakeppni

Pálmi Haraldsson, fyrrverandi eigandi Fons, segist bera ábyrgð á efnahagshruninu en að stærsti sökudólgurinn sé hið opinbera. Hann viðurkennir að hafa tekið þátt í siðferðilega vafasömum viðskiptum en að hann hafi ekki framið nein lögbrot. Pálmi segist sjá eftir mannorði sínu. Þetta kemur fram í viðtali við hann í DV í dag. Hann segir að umsvifamiklir fjárfestar hafi verið í „typpakeppni."

Pálmi var áberandi fjárfestir árin fyrir hrun og átti meðal annars Skeljung, Securitas, Iceland Express og Serling flugfélagið.

Ber ábyrgð á „þessari vitleysu"

„Ég ætla ekki að draga úr minni ábyrgð í þeim málum. Ég var þátttakandi í þessu. Þetta voru þær leikreglur sem voru í gangi, skrifaðar sem óskrifaðar," segir Pálmi aðspurður hvort að fjármagnseigendurnir og bankarnir hafi ekki drifið hagkerfið sem féll áfram. Aftur á móti segir hann að eftirlitsaðilarnir Seðlabankinn og Fjármálaeftirlitið beri mesta ábyrgð.

Auk þess telur Pálmi að þingmenn sem voru í meirihluta á Alþingi þegar leikreglurnar í viðskiptalífinu voru búnar til beri ábyrgð. Það sama eigi við um eigendur og stjórnendur bankanna og síðast en ekki síst forystumenn í atvinnulífinu og samtökum þeirra.

„Auðvitað er ég einn af þeim af aðilum sem tóku þátt í þessari vitleysu. Þetta eru náttúrulega bara sorglegir atburðir sem hafa gerst sér í samfélaginu," segir Pálmi.

Sér ekki eftir peningunum heldur mannorðinu

Pálmi segir að sú eftirsjá sem hann ber í brjósti snúist ekki um peninga. „Líður mér illa? Já, alveg skelfilega. Sé ég eftir peningunum sem ég hef tapað í þessi hruni? Nei. Sé ég eftir mannorði mínu? Já, alveg gríðarlega, gríðarlega. Ég gerði allt til að fá það aftur. Af hverju missti ég það? Af því að ég var þátttakandi í leiknum. Skammast ég mín? Já, að sjálfsögðu fyrir sumt en annað ekki. Af hverju skyldi ég ekki gera það? Annað væri óeðlilegt," segir Pálmi í viðtalinu.

Hættur að fara með börnin í sund

Pálmi segist verða fyrir aðkasti á götum úti og lenda í því að fólk öskri á hann. „Heldur þú að ég líði ekki fyrir að geta ekki farið á kaffihús á Íslandi lengur? Auðvitað er þetta ofboðslega sárt. Maður lærir það að peningar eru ekki allt. Það eru önnur gildi í lífinu. Gildismat mitt er algerlega breytt," segir Pálmi en hann segist einnig hafa fengið morðhótanir og hótunarbréf í pósti.

„Þetta er komið út fyrir öll velsæmismörk." Pálmi segist vera búinn að loka sig algerlega af og að honum líði eins og stofufanga. Hann sé hættur að fara með börnin sín í sund.