Viðskipti erlent

Vogunarsjóðir beðnir um að eyða ekki evru-gögnum

Bandarísk stjórnvöld hafa farið fram á það við vognarsjóði þar í landi að þeir eyði ekki gögnum sínum um veðmál/stöðutöku gegn evrunni. Á sama tíma aukast rannsóknir Í Bandaríkjunum og Evrópu á þætti vogunarsjóða og banka í grísku skuldakreppunni.

Í frétt um málið á Bloomberg fréttaveitunni segir að beðni bandarískra stjórnvalda komi í kjölfar fundar sem sumir af stærstu vogunarsjóðum heims áttu þann 8. febrúar s.l. á Manhattan þar sem rætt var um að skortselja evruna og ná gengi hennar þannig niður í einn á móti einum gagnvart dollaranum.

Meðal þeirra sem sjóða sem áttu háttsetta fulltrúa á þessum fundi voru SAC Capital, Soros Management og Brigade Capital. Enginn talsmaður þessara sjóða vildi ræða málið við Bloomberg þegar eftir því var leitað.

Bloomberg greinir frá því að auk stöðutöku gegn evrunni var á fundinum rætt um að taka stöður með kanadíska dollaranum og hlutum í Philip Morris International og stöður gegn hlutum í Wells Fargo og Bank of America.

Herbert Hovenkamp lögfræðikennari við háskólann í Iowa segir í samtali við Bloomberg að stóra spurningin sé hvort það hafi verið um óformlegan fund að ræða þar sem miðlarar ræddu viðbrögð sín við þeim straumum sem eru í gangi á markaðinum.

„Slíkt væri löglegt," segir Hovenkamp. „Það sem er ólöglegt er ef menn hafi sammælst um ákveðin verð á evrunni til að fella gengi hennar og koma þar með af stað áhlaupi sem myndi veikja evruna ennfrekar."

Bandarískir þingmenn hafa ákveðið að halda vitnaleiðslur um hvaða hlutverk Goldman Sachs gæti hafa átt í grísku skuldakreppunni. Vitnaleiðslurnar beinast að afleiðuviðskiptum Goldman Sachs við grískar fjármálastofnanir. Á sama tíma hefur framkvæmdastjórn ESB boðað rannsókn á viðskiptum vogunarsjóða og banka með skuldatryggingar í kjölfar grísku kreppunnar.







Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×