Leita að kínverskum júnkum á hafsbotni

Kína og Kenya hafa undirritað samkomulag um að leita að kínverskum júnkum sem fórust við austurströnd Afríku fyrir 600 árum.

Leitin mun standa í þrjú ár og verður leitað í þrjá mánuði á hverju ári. Það er kínverska viðskiptaráðuneytið sem borgar brúsann.

Skipin eru talin hafa tilheyrt miklum flota sem flotaforinginn Zeng He stýrði. Flotinn kom til hafnarbæjarins Malindi í Kenya árið 1418.

Það hefur lengi lifað í kenískum sögnum að skipreika kínverskir sjómenn hafi sest þar að og kvænst innfæddum konum.

Frá 1405 til 1433 stýrði Zeng He sjö leiðöngrum til þess að örva viðskipti og viðurkenningu á Ming keisaradæminu sem tók við völdum í Kína árið 1368.

Keisararnir misstu þó fljótlega áhuga á umheiminum og leiðöngrunum var hætt meira en hálfri öld áður en Kólumbus kom til Nýja Heimsins.

Kínverjar hafa mjög haldið Zeng He á lofti undanfarin ár til vitnis um friðsamleg samskipti við önnur lönd.

Sagan sýnir þó að skip hans voru vel vopnum búin og tóku þátt í að minnsta kosti þrem meiriháttar hernaðaraðgerðum.