Nýtt Ísland tilbúið að veita bloggara frekari námsstyrki

Samtökin Nýtt Ísland, sem hafa staðið fyrir bílamótmælum fyrir utan lánastofnanir undanfarna mánuði til þess að mótmæla breyttum myntkörfulánum, hafa athyglisverð mál á sinni stefnuskrá. Þá vekur mesta athygli stefnumálið þeirra er varðar bloggarann Teit Atlason sem skrifar á heimasíðu DV.

Á milli stefnumála eins og: „Ríkisstarfsmönnum fækkað verulega. Öllum millistjórnendum, framkvæmdastjórum og forstjórum sagt upp á 1.- 3ja ára uppsagnafresti og þeir endurráðnir er þurfa þykir."

Og: „Styrkir til listamanna afnumdir með öllu."

Stefnumál samtakanna. Stefnumálið varðandi Teit má finna fyrir miðju.

Þá má lesa sérkennilegt mál á stefnuskrá samtakanna sem er: „Jákvætt verði tekið í að veita Teiti Atlasyni frekari námsstyrk við nám í Gautaborg."

Fyrir þá sem ekki vita það þá er Teitur Atlason bloggari á DV.is en hann hefur gagnrýnt samtökin harðlega á vefsvæði sínu undanfarnar vikur. Eins og greint er frá á heimasíðu Nýs Íslands þá stundar Teitur nám í Gautaborg.

Teitur hefur gagnrýnt félagsskapinn harkalega og skrifar meðal annars á heimasíðu sína: „Mér sýnist þetta vera klassískt hávaðafélag sem notfærir sér viðkvæmt efnahagsástand og bágindi fólks til þess að hafa áhrif á þjóðmálaumræðuna og koma sjálfu sér og sínum ógeðfelldu skoðunum í deiglu þjóðmálaumræðunnar."

Í ljósi þessa má ætla að stefnumálið, sem finna má undir liðnum efnahagsmál á síðu Ný Íslands, sé sett fram í kaldhæðni.