Þór Saari: Endalok VG sem öðruvísi stjórnmálaafls staðreynd

Þór Saari, þingmaður Hreyfingarinnar, segir að Björn Valur Gíslason, þingmaður VG, sé farinn á taugum. Björn grípi til uppspuna til að breiða yfir eigið klúður.

Björn Valur fer hörðum orðum um stjórnarandstöðuna og útspil hennar í Icesave málinu í pistli á heimasíðu sinni í kvöld. Hann segir að sáttatónn minnihlutans í málinu sé falskur. Sæmileg sátt hafi náðst um Icesave í sumar en þegar á reyndi hafi stjórnarandstaðan hlaupið frá ábyrgð í málinu og neitað að styðja það til enda. Þannig hafi þingmenn minnihlutans klofið þing og þjóð upp í tvær fylkingar þegar kemur að Icesave.

Þór svarar Birni fullum hálsi á heimasíðu sinni. „Nú er hann alveg farinn á taugum manngreyið, sá sem hvað harðast beitti sér gegn þverpólitísku samstöðunni í sumar er farinn að grípa til hreins uppspuna til að breiða yfir eigið klúður. Endalok VG sem öðruvísi stjórnmálaafls er staðreynd," segir Þór.