Ásgarður hlaut Samfélagsverðlaun Fréttablaðsins

Ásgarður handverkstæði hlaut Samfélagsverðlaun Fréttablaðsins að þessu sinni. Ásgarður er verndaður vinnustaður fyrir fólk með þroskahömlun. Verðlaunin voru afhent við hátíðlega athöfn í Þjóðmenningarhúsinu í dag.

Í umsögn um Ásgarð segir að fagleg markmiðs vinnustaðarins eigi rætur í uppeldiskenningum Rudolfs Steiner en í kenningum hans felist meðal annars að ekki er litið á fötlun sem vandamál heldur möguleika. Forseti Íslands, Ólafur Ragnar Grímsson, afhenti fulltrúum Ásgarðs verðlaunin. Ari Edwald, forstjóri 365, afhenti þeim síðan verðlaunafé að upphæð ein milljón króna.

Þetta er í fjórða sinn sem Fréttablaðið veitir Samfélagsverðlaunin en þau eru veitt í fjórum flokkum auk heiðursverðlauna.

Aðrir sem voru únefndir til Samfélagsverðlaunanna voru :

Ekron

Höndin

Ljósið

Vinir Indlands

Til Samfélagsverðlaunanna koma til greina félagasamtök sem hafa unnið framúrskarandi mannúðar- eða náttúruverndarstarf; samtök sem hafa með starfi sínu lagt sitt af mörkum til að gera samfélagið betra fyrir okkur öll.

Hvunndagshetja



Hvunndagshetja ársins 2008 er Bergdís Jónsdóttir. Bergdís er snyrtifræðingur í eigin rekstri. Einn dag í viku lokar hún stofunni og mætir á Dagsetur Hjálpræðishersins þar sem hún þvær og snyrtir fætur heimilislausra fastagesta staðarins.

Aðrir sem voru tilnefndir í þessum flokki:

Anna Marta Ásgeirsdóttir og Ingólfur Örn Guðmundsson

Guðrún Arndís Tryggvadóttir

Gunnar og Kristján Jónssynir

Sigríður Valdís Bergvinsdóttir

Verðlaunin eru veitt einstaklingi sem hefur sýnt einstaka óeigingirni eða hugrekki annað hvort við vinnu að ákveðnum málaflokki eða í tengslum við einn atburð.



Frá kynslóð til kynslóðar

Verðlaun í þessum flokki fær Norðlingaskóli. Í Norðlingaskóla hefur verið bryddað upp á ýmsum nýjungum. Öflug tengsl við heimilin og nærsamfélagið eru meðal þess sem einkennir starf skólans.

Aðrir tilnefndir í þessum flokki:

Gylfi Jón Gylfason

KFUM og KFUK

Ólafur Beinteinn Ólafsson

Svanhildur Sif Haraldsdóttir

Í þessum flokki koma allir þeir til greina sem hafa unnið eftirtektarvert starf í þágu menntunar, uppfræðslu eða umönnunar þeirrar kynslóðar sem er að vaxa úr grasi, jafnt einstaklingar sem samtök eða stofnanir.

Til atlögu gegn fordómum

Rauði krossinn á Akranesi hlýtur verðlaunin í þessum flokki fyrir hlutverk sitt við góða aðlögun hóps palestínsks flóttafólks að samfélaginu á Akranesi.

Aðrir tilnefndir:

Alþjóðahús í Breiðholti

Dagur Steinn Elfu Ómarsson, Elvar Sveinn Jóhannsson, Gunnar Darri Kjærnested, Jóhann Haukur Arnarson, Jón Gylfi Sigfússon

Sigrún Daníelsdóttir

Styrmir Barkarson

Verðlaun í þessum flokki eru veitt einstaklingi eða félagasamtökum sem hafa unnið ötullega að því að eyða fordómum í samfélaginu.

Heiðursverðlaun

Heiðursverðlaun Samfélagsverðlauna Fréttablaðsins hlýtur Jóhanna Kristjónsdóttir, rithöfundur og blaðamaður. Jóhanna hefur um árabil kynnt menningu Mið-Austurlanda á Íslandi og með því lagt mikið af mörkum til að draga úr fordómum. Á sama tíma hefur hún staðið fyrir hjálparstarfi í Jemen sem meðal annars snýr að því að gefa börnum kost á menntun sem þau ættu ella ekki kost á, sökum fátæktar. Þannig hefur Jóhanna látið gott af sér leiða bæði hér heima og í Jemen.

Um verðlaunin

Vel á fjórða hundrað tilnefninga til Samfélagsverðlaunanna bárust frá lesendum Fréttablaðsins. Markmið með Samfélagsverðlaununum er að beina sjónum að þeim góðu verkum sem unnin eru í samfélaginu.

Samfélagsverðlaun Fréttablaðsins eru sem fyrr segir ein milljón króna, aðrir verðlaunahafar fá síma.

Dómnefnd var þannig skipuð: Steinunn Stefánsdóttir, aðstoðarritstjóri Fréttablaðsins, var formaður nefndarinnar. Aðrir: Elliði Vignisson, bæjarstjóri í Vestmannaeyjum, Guðjón Friðriksson, sagnfræðingur, Hildur Petersen, stjórnarformaður Kaffitárs og Pfaff og Katrín Jakobsdóttir menntamálaráðherra.