Fimmtungur stendur utan þjóðkirkju

Um fimmtungur þjóðarinnar stendur nú utan þjóðkirkjunnar samkvæmt nýjustu tölum Hagstofunnar. Átján prósent eru í öðrum trúfélögum og 2,9 prósent standa utan trúfélaga. Þá kann frekari breytinga að vera að vænta eftir sérstakt átak Vantrúar, félagsskapar trúleysingja, sem boðið hafa fólki aðstoð sína við „leiðréttingu" skráningar í trúfélög.

Í byrjun þessa mánaðar var viðurkennd skráning tveggja nýrra trúfélaga, Kirkju hins upprisna lífs og Alþjóðlegrar kirkju Guðs og embætti Jesú Krists. Núna er því skráð hér á landi 31 trúfélag utan Þjóðkirkjunnar. Árið 1990 voru þau 13 talsins og 24 árið 2000. Síðustu ár hefur að jafnaði fjölgað um eitt til tvö trúfélög á ári, að sögn Hjalta Zóphaníassonar, skrifstofustjóra borgara- og neytendaskrifstofu Dóms- og mannréttindaráðuneytis­ins. Hjalti segir hins vegar lítið hægt að lesa úr því að nýjustu tvö trúfélögin skuli hafa verið skráð sama daginn. Þannig hafi bara hist á að erindi þeirra hafi verið tekin fyrir á sama fundi hjá álitsgefandi nefnd þeirri sem metur trúfélög og umsóknir þeirra um skráningu.

Hjalti segir nýskráningum trúfélaga heldur hafa tekið að fjölga eftir aldamótin síðustu, en sú þróun haldist að nokkru í hendur við fjölgun aðfluttra Íslendinga sem borið hafi með sér fleiri trúarbrögð. „Mikið af erlendu fólki var annarrar trúar og helst breytingin að hluta í hendur við uppbyggingu og virkjanaframkvæmdir." Þá segist Hjalti hafa heyrt utan af sér af vakningu sem í gangi sé hvað varði skráningu fólks utan trúfélaga og rekur hana til sérstaks átaks Vantrúar, félags trúlausra.

Vésteinn Valgarðsson hjá Vantrú segir félagið frá árslokum 2005 hafa, með hléum þó, aðstoðað fólk við að „leiðrétta skráningu sína í trúfélög". Í sumar segir hann að komið hafi dálítill kippur í þetta starf þegar tala þeirra sem félagið hafi aðstoðað með þessum hætti var komin í 790. „Við ákváðum þá að setja kraft í þetta og ná tölunni í 1.000 fyrir 1. desember á þessu ári. Núna stöndum við í 980 þannig að það vantar bara herslumuninn," segir hann. „Þetta ætti að hafast á allra næstu dögum."

Vésteinn segir að langflestir kjósi að standa utan trúfélaga, en félagið aðstoði líka þá sem skipta vilji um trúfélag. Flestir þeirra sem þannig standi á um hafi kosið að skrá sig í Ásatrúar­félagið. Aðstoð félagsins felst annars í því að sjálfboðaliðar fara á mannamót og um háskólasvæði og bjóða fólki að fylla út eyðublöð þau sem skila þarf inn til Þjóðskrár vegna trúfélagaskipta og koma þeim síðan til skila.
olikr@frettabladid.is