Styrkja Nýsköpunarsjóð námsmanna

Katrín Jakobsdóttir, ráðherra mennta- og menningarmála, og Katrín Júlíusdóttir iðnaðarráðherra, hafa styrkt Nýsköpunarsjóð námsmanna um samtals 15 milljónir króna. Um er að ræða fimm milljónir frá ráðuneyti mennta- og menningarmála og tíu milljónir frá iðnaðarráðuneyti.

Í tilkynningu frá menntamálaráðuneytinu kemur fram að með þessu vilja ráðherrarnir gefa háskólanemum möguleika á að stunda sumarvinnu við nýsköpun og rannsóknir og undirstrika þannig mikilvægi rannsókna og nýsköpunar í uppbyggingu Íslands.

Styrkir verða veittir til rannsóknar- og þróunarverkefna sem líkleg þykja til að stuðla að nýsköpun og auknum tengslum háskóla, stofnana og fyrirtækja. Umsóknir um styrki eru metnar með hliðsjón af möguleikum til hagnýtingar í atvinnulífi og nýnæmi fyrir þekkingu í viðkomandi fræðigrein. Umsóknarfrestur er til 3. júní næstkomandi.