Leigumarkaðurinn heldur áfram að vaxa

Alls voru þinglýstir 861 leigusamningar nú í októbermánuði sem eru 20% fleiri samningar en gerðir voru á sama mánuði í fyrra. Þessi aukning er í takt við þá þróun sem hefur verið á árinu og lýsir hún aukinni sókn í leiguhúsnæði.

Greining Íslandsbanka fjallar um málið í Morgunkorni sínu. Þar segir að á fyrstu tíu mánuðum ársins höfðu alls 9.194 leigusamningum með íbúðarhúsnæði verið þinglýst samanborið við 6.084 á sama tímabili fyrir ári. Þetta jafngildir 51% aukningu á milli ára. Það er Fasteignaskrá Íslands sem tekur saman þessi gögn og birti í gær.

Í ár hafa mun fleiri leigusamningum verið þinglýst með húsnæði en kaupsamningum á höfuðborgarsvæðinu og ljóst er að minna er um kaup og sölu íbúða en á móti hefur leigumarkaðurinn stækkað.

Þannig var þinglýst 1.621 kaupsamningi með íbúðarhúsnæði á höfuðborgarsvæðinu á fyrstu tíu mánuðum þessa árs samanborið 5.992 leigusamninga. Jafnframt hefur verulega dregið úr fjölda skráðra íbúða sem sýnir að minna er um nýbyggingar.

Í því efnahagsumhverfi sem heimilin búa við um þessar mundir, þar sem atvinnuleysi er vaxandi, kaupmáttur launa að dragast saman og húsnæðisverð að lækka kemur ekki á óvart að fleiri taka þann kost að leigja fremur en að láta fé sitt undir í íbúðarkaup.

Fækkun á skráðum íbúðum, minni velta á fasteignamarkaði og aukin sókn í leiguhúsnæði skýrist því án efa af efnahagsástandinu. Hér má jafnframt taka það með í reikninginn að stór hluti þeirra erlendu aðila sem hingað streymdu í uppsveiflunni hefur horfið af landi brott en þeir voru umfangsmiklir á leigumarkaðnum fyrir bankahrunið.