Pálmatré uxu á Norðurskautslandinu

Pálmatré uxu á Norðurskautinu fyrir fimmtíu milljónum ára samkvæmt rannsókn sem kynnt hefur verið í vísindaritinu Nature Geoscience.

Rannsakendurnir segja að þetta bendi til þess að þau veðurfarslíkön sem notuð séu í dag séu stórlega gölluð.

Appy Sluijs sem stýrði rannsókninni fyrir háskólann í Utrect í Hollandi segir að gróðurfar á Norðurskautinu hafi á þessum tíma verið svipað og er í Flórída í dag.

Vísindamennirnir fundu leifarnar af pálmatrjánum í jarðvegssýnum sem tekin voru á hafsbotni um 500 kílómetra frá Norðurpólnum.

Þeir segja að aldursgreining hafi sýnt að þau hafi vaxið þar fyrir 53,5 milljónum ára. Það þýði að meðalhiti köldustu mánaðanna hafi þá ekki verið undir átta gráðum.

Þetta stangast á við veðurfarslíkön sem notuð eru í dag. Samkvæmt þeim á meðalhitinn að hafa verið undir frostmarki á þessu tímabili.