Hugmynd Tryggva er eins og að fara á rjúpnaveiðar með fallbyssu

Að ætla að fella niður 20% af skuldum almennings, flatt á línuna er eins og að fara á rjúpnaveiðar með fallbyssu, segir Gylfi Magnússon viðskiptaráðherra. Gylfi gagnrýnir hugmyndir Tryggva Þórs Herbertssonar, hagfræðings og frambjóðanda Sjálfstæðisflokksins, um skuldaniðurfellingar harðlega.

Gylfi segir hins vegar að skuldir þeirra sem eigi í verulegum vandræðum verði felldar niður og tvö frumvörp séu í þinginu um það. Hann segir hins vegar flata niðurfellingu á línuna vera allt of dýra aðferð og allt of ómarkvissa.

Tryggvi og Gylfi tókust á um málið í Íslandi í dag. Tryggi Þór vill að 20% af skuldum fólks verði niðurfelldar. Hann sakar stjórnvöld um að þagga niður hugmynd sína og segir það vera skrýtið að ekki megi ræða hana. Hann segir meðal annars að fjármálaráðherra hafi ráðist að sér persónulega fyrir það að hafa reifað hugmyndina.

Gylfi segir hins vegar að hugmyndin um flata niðurskurð gangi ekki upp. Íbúðalánasjóður yrði gjaldþrota ef farið yrði að hugmyndinni. Þetta yrði verulegt áfall fyrir lífeyrissjóðina en stærsta áfallið yrði að bankarnir myndu tapa svo miklu fé að ríkissjóður myndi eiga erfitt með að halda þeim á floti.