Íslensk mannæta á hvíta tjaldið

„Ég er ekki alveg búinn að ákveða hvort þetta verði leikin mynd eða teiknimynd. Ég hallast frekar að því að þetta verði teiknimynd," segir Þórarinn Leifsson en hann, ásamt konu hans Auði Jónsdóttur, ætlar að skrifa kvikmyndahandrit upp úr bók Þórarins, Leyndarmálið hans pabba.
Bókin vakti töluverða athygli þegar hún kom út 2007 en hún segir frá systkinum sem glíma við töluverðan vanda; pabbi þeirra sporðrennir nefnilega manneskjum í tíma og ótíma. Þórarinn er auk þess að skrifa handrit að næstu bók sinni sem ráðgert er að komi út í haust. Hann vildi ekkert gefa upp um innihald hennar að svo stöddu.

Þórarinn var staddur í Berlín þegar Fréttablaðið hafði upp á honum en hann verður viðstaddur næststærstu bókahátíð Þýskalands í Leipzig enda er Leyndarmálið hans pabba að koma út á þýsku undir nafninu Papas Geheimnis. „Ég er mjög spenntur fyrir þessu, það er þýskt barnaleikhús í Leipzig sem er að leiklesa bókina og hún hefur fengið fína dóma," útskýrir Þórarinn en einn gagnrýnandinn sagði að svona bók hefði aldrei verið skrifuð.

Varla er hægt að sleppa Þórarni án þess að spyrja hvernig honum hafi verið tekið, skuldugum Íslendingnum, í Þýskalandi. „Ég fór á barinn í gær og sagði að við Íslendingar værum mestu taparar í heimi. Þeim fannst það bara fyndið og spurðu hvort ég væri ekta Íslendingur," segir Þórarinn. „Ég held að þetta sé bara miklu heilbrigðara svona en þegar við vorum uppasvín, núna erum við bara Íslendingar á okkar eigin forsendum."
- fgg