Þingmenn keppast um að biðjast afsökunar

Tekist var á um ábyrgð á bankahruninu á Alþingi og kepptust þingmenn um að biðjast afsökunar. Mörður Árnason, varaþingmaður Samfylkingarinnar, hóf umræðuna og þakkaði Ástu Möller, þingmanni Sjálfstæðisflokksins, fyrir afsökunarbeiðni hennar en hún sagðist í gær eiga sinn þátt í því andvaraleysi sem þingmenn þjóðarinnar hafa gert sig seka um á seinustu árum gagnvart þróun efnahagsmála í landinu. Sjálfur sagðist Mörður ekki hafa verið nægjanlega gagnrýnin á forystumenn Samfylkingarinnar og baðst afsökunar á því.

Sigurður Kári Kristjánsson, þingmaður Sjálfstæðisflokksins, sagði að það hefði margoft komið fram að Sjálfstæðisflokkurinn axli sína ábyrgð. Forystumenn flokksins væru margir hverjir að hætta í stjórnmálum en það sama væri ekki hægt að segja um leiðtoga Samfylkingarinnar sem átti sæti í ríkisstjórn með Sjálfstæðisflokksins - og sætu enn í ríkisstjórn.

,,Ég skorast ekki undan og vissulega ber ég mína ábyrgð," sagði Pétur Blöndal þingmaður Sjálfstæðisflokksins. Hann sagðist hafa hafa átt að sjá hættuna af Icesave-reikningunum þrátt fyrir að Evrópusambandið hefði ekki gert það.

Katrín Júlíusdóttir, þingmaður Samfylkingarinnar, sagði að Samfylkingin hefði gert stór mistök með því að fara í stjórnarsamstarf við Sjálfstæðisflokkinn.

Árni Þór Sigurðsson, þingmaður Vinstri grænna, sagði að Samfylkingin hefði þrátt fyrir allt axlað tiltekna ábyrgð með því að slíta stjórnarsamstarfinu við Sjálfstæðisflokkinn sem hafi verið við völd í 18 ár. Hann sagði að stefna Sjálfstæðisflokksins hefði brugðist. ,,Við bíðum eftir því að fá afsökunarbeiðni frá formanni Sjálfstæðisflokksins."