Rekin frá Bandaríkjunum en barnið varð eftir

Dagbjört Rós Halldórsdóttir, fær ekki að snúa til Bandaríkjanna til að sækja sautján mánaða dóttur sína. Henni var vísað frá Bandaríkjunum fyrir tveimur mánuðum en hún hafði þá ekki endurnýjað dvalarleyfi sitt. Dóttirin varð eftir í Bandaríkjunum, en Dagbjört fær ekki vegabréfsáritun til að hitta barnið.

Dagbjört Rós sem er tuttugu og fimm ára var áður búsett í Þýskalandi ásamt eiginmanni sínum, sem hún kynntist á Keflavíkurflugvelli árið 2003. Hún fluttist með honum til Bandaríkjanna fyrir ári. Hún á fyrir sex ára son en eignaðist dóttur með eiginmanninum sem er sautján mánaða í dag. Erfiðleikar voru í hjónabandinu og maðurinn hafði lofað að skrifa undir dvalarleyfi fyrir hana í Bandaríkjunum en ekki staðið við það. Hann fór síðan að hóta henni með því að hún væri ólöglegur innflytjandi og gæti því ekki yfirgefið landið með barnið.

Dagbjört var í sambandi við skrifstofur innflytjendamála í Bandaríkjunum þar sem hún fékk þær upplýsingar að ekkert væri hægt að gera nema undirskriftin fengist. Þar sem sonur hennar var í Bandarískum skóla og hún var enn með gilt skírteini frá bandarískum hermálayfirvöldum í Þýskalandi, taldi hún að ekki væri hætta á ferðum.

Áfallið dundi yfir þegar hún var stöðvuð fyrir hraðakstur og handtekinn í kjölfarið fyrir að vera ólöglega í landinu. Eiginmaður hennar kom barninu fyrir hjá foreldrum sínum og neitar móðurinni um að tala við barnið eða fá það til sín. Bandaríska sendiráðið hefur einning neitað henni um vegabréfsáritun til að fara til Bandaríkjanna til að sækja rétt sinn í forræðisdeilu.

Hreinn Pálsson sendiráðsritari hjá Utanríkisráðuneytinu segir að reynt sé að aðstoða Dagbjörtu, aðallega með því að veita ráðgjöf. Henni verði hjálpað að finna lögfræðing í Bandaríkjunum en hún verði að greiða fyrir lögfræðiaðstoð úr eigin vasa. Sá kostnaður gæti hlaupið á tugum milljóna.

Dagbjört Rós segir að sér hafi verið ráðlagt að vinna hluta af pappírsvinnunni sjálf til að draga úr kostnaði, það sé afar flókið ekki síst þar sem hún megi ekki vera í Bandaríkjunum. Hún segir þeirri spurningu enn ósvarað hvort hún geti höfðað forræðismál nema vera stödd vestanhafs.