Segja afgreiðsluna hafa verið eðlilega

Bjarni Benediktsson, formaður allsherjarnefndar og þingmaður Sjálfstæðisflokksins, segir Alþingi hafa staðið eðlilega að því að veita átján útlendingum sem búsettir eru hér á land íslenskt ríkisfang í mars síðastliðnum.

„Fólki finnst það eitthvað sérstakt við þetta mál að þessi umrædda kona hafi verið hér á landi í stuttan tíma. Af þeim málum sem Alþingi hefur afgreitt á þessu kjörtímabili eru þrjátíu prósent umsækjenda sem hafa verið tvö ár eða skemur hér á landi. Þannig að þetta mál er ekki sérstakt að neinu leyti hvað það snertir."

Lucia Celeste Molina Sierra, 22 ára kona frá Gvatemala sem er kærasta Birnis Orra Péturssonar, sonar Jónínu Bjartmarz umhverfisráðherra, var ein af átján sem fengu íslenskan ríkisborgararétt í mars síðastliðnum. Umsækjendur voru 36 í það skiptið.

Jónína neitar því alfarið að hafa beitt áhrifum sínum til þess að greiða fyrir því að Lucia fengi ríkisborgararétt. Jónína var umboðsmaður stúlkunnar er hún fékk skráð dvalarleyfi hér á landi í nóvember 2005. „Ég var skráður umboðsmaður er hún var að sækja um dvalarleyfi hér á landi og Útlendingastofnun var kunnugt um það. Ég ræddi aldrei við neinn hjá Útlendingastofnun um ríkisborgararétt. Tengsl mín við málið voru engin."

Þrír nefndarmenn, Bjarni, Guðjón Ólafur Jónsson og Guðrún Ögmundsdóttir, fóru yfir umsóknirnar sem fyrir lágu og lögðu til að átján einstaklingar fengju ríkisborgararétt að þessu sinni. Þau neita því öll að hafa vitað um tengsl Luciu við Jónínu og segja ekkert óeðlilegt hafa verið við afgreiðsluna.

Lucia hafði verið með dvalarleyfi námsmanna í fimmtán mánuði en almenna reglan, samkvæmt lögum um ríkisborgararétt, er að einstaklingar þurfi að hafa búið hér á landi í sjö ár áður en ríkisfang er veitt, en þrjú ár ef viðkomandi einstaklingur hefur verið í hjúskap með Íslendingi. Umsóknir þeirra sem ekki uppfylla þessi skilyrði koma inn á borð allsherjarnefndar en aðrar ekki.

Dómsmálaráðherra veitir íslenskan ríkisborgararétt eftir að Útlendingastofnun hefur farið yfir umsagnir. Í tilfelli Luciu taldi Útlendingastofnun að hún hefði dvalið hér á landi í of stuttan tíma til þess að hægt væri að veita henni íslenskan ríkisborgararétt. Allsherjarnefnd fékk því umsókn hennar til umfjöllunar. Jónína greiddi sjálf atkvæði með því að útvaldir umsækjendur fengju ríkisborgararétt.

Bjarni segir það ekki hafa legið fyrir, út frá þeim upplýsingum sem lágu til grundvallar er umsóknin var samþykkt í allsherjarnefnd, að Jónína hefði verið umboðsmaður stúlkunnar er hún fékk dvalarleyfi.

„Við vorum ekki með upplýsingar um að hún [Jónína Bjartmarz] hefði verið skráður umboðsmaður stúlkunnar er hún fékk dvalarleyfi hér á landi. Það var ekkert óeðlilegt við afgreiðslu þessa máls, það fór eðlilega leið og Alþingi samþykkti með þverpólitískum meirihluta eins og alltaf er í þessum málum," sagði Bjarni.