Viðgerð á CANTAT-3 lýkur um næstu mánaðamót

Reiknað er með að viðgerð á CANTAT-3 sæstrengnum, sem bilaði um miðjan síðasta mánuð, verði lokið um næstu mánaðamót. Fram kemur í tilkynningu frá Farice, sem rekur strenginn, að viðgerðarskipið Pacific Guardian sigli frá Bermúda þann 5. janúar til lokaviðgerðar og er gert ráð fyrir að viðgerð verði lokið 31. janúar. Það kann þó að breytast ef veðurskilyrði verða óhagstæð.

Strengurinn bilaði 16. desemer síðastliðinn um 1500 kílmetra vestur af landinu. Strengurinn tengir Ísland við umheiminn ásamt Farice-strengnum en ríkisstjórnin hefur nú ákveðið að hefja undirbúning að lagningu nýs sæstrengs milli Íslands og Evrópu sem ætlunin er að taka í gagnið seint á næsta ári.