Annar alvarlegur bruni vegna etanól-arins

Stúlka um tvítugt brenndist á hendi og líkama þegar eldur blossaði upp í etanól arni á veitingastaðnum Austur í Reykjavík um níuleytið í gærkvöldi.

Stúlkan er starfsmaður á veitingastaðnum og var að kveikja upp í arninum þegar slysið varð. Hún var flutt á slysadeild í Fossvogi til aðhlynningar en ekki er vitað hversu alvarleg brunasár hún hlaut. Svo virðist sem kviknað hafi í fatnaði hennar þegar eldurinn gaus upp svo hún brenndist á síðu og bringu.

Þess má geta að keimlíkt slys varð í heimahúsi í Kópavogi skömmu fyrir jól. Þá brenndist kona illa eftir að hún kveikti upp í etanol arni. Snarræði sonar hennar varð til þess að konan brenndist ekki lífshættulega. Þá kviknaði einnig í heimili konunnar.