Lífið

Allt falt nema nærbrækur og tannbursti

Guðrún Ansnes skrifar
Ýmissa grasa kennir hjá þessum listaspírum, en þær lofa til að mynda bongóblíðu og sól handa öllum.
Ýmissa grasa kennir hjá þessum listaspírum, en þær lofa til að mynda bongóblíðu og sól handa öllum. vísir/andri marinó
„Ég var að klára Listaháskólann og er með tonn af skuldum á bakinu svo ég verð hér alla helgina að selja utan af mér,“ segir Viktoría Blöndal, sem stendur fyrir allsherjar flóamarkaði á Kaffistofunni, nemendagalleríi LHÍ ásamt vinkonu sinni Söru Björg Bjarnadóttur.

„Ég ætla að flytja af landi brott og þessi námslán eru ekkert lamb að leika sér við, svo nú verður allt til sölu, nema nærbuxurnar og tannburstinn,“ segir Viktoría ansi borubrött. Mun hún leggja Ósló að fótum sér, en sjálf er hún leikstjóri, skáld, rithöfundur og ýmislegt fleira, sem hún mun vinna með þar ytra.

Meðal þess sem þær stöllur ætla að bjóða upp á er sjálfsævisaga Viktoríu. „Ég varð nýlega þrítug svo ég hef verið að skrifa ævisöguna og tek tíu ár fyrir í hverju bindi,“ segir Viktoría en hún hefur gefið bækurnar út í þrjú þúsund eintökum, sem þó hafa ekki farið í almenna sölu fyrr en nú. „Ég hef aðallega verið að selja vinum og vandamönnum, en nú verð ég að eiga fyrir flutningunum.“

Þá munu þær bjóða upp á glás af Jesústyttum og eftirlíkingum af Maríu mey, sem Viktoría reyndi lengi að samsama sig við í æsku, en hefur nú ákveðið að láta lönd og leið, og geta aðrir nú notið góðs af þeim. Einnig verða málverk eftir Söru til sölu. „Hún er reyndar ekki að fara neitt, en verður að fjármagna næsta Cocoa Puffs skammtinn. Einu sinni var neysla veisla, en nú þarf að harka.“

„Til að gera góðan markað enn betri mun leynigestur kíkja við, sem ég get ómögulega sagt hver er, en ég get sagt að sjón er sögu ríkari,“ bendir Viktoría á og laumar því að, að þarna sé um tónlistaratriði að ræða.

Munu Viktoría og Sara taka á móti gestum og gangandi á Hverfisgötu, og segjast hafa fengið vilyrði frá sjálfri sólinni fyrir að láta sjá sig. „Ég lofa tuttugu og átta gráðum og nógu af útfjólubláum geislum. En auðvitað bara til þeirra sem versla fyrir fimm þúsund krónur eða meira,“ segir Viktoría skellihlæjandi að lokum.






Fleiri fréttir

Sjá meira


×