Áfellisdómur að gengistryggð lán skyldu viðgangast

„Þetta er dæmalaus uppákoma, þegar grundvöllur umfangsmikillar lánastarfsemi sem búin er að viðgangast í níu ár er að hluta til eða verulegu leyti dæmdur ólöglegur," segir Steingrímur J. Sigfússon fjármálaráðherra um dóm Hæstaréttar vegna gengistryggðra lána.

Steingrímur sagði í samtali við Sólveigu Bergmann og Sigurjón M. Egilsson Í bítinu á Bylgjunni að lögin hafi verið skýr. Það hafi verið ætlun löggjafans að koma í veg fyrir svona lán. „Þetta er alveg makalaus uppákoma og áfellisdómur fyrir fjármálakerfið, eftirlitskerfið og fyrir alla að þetta skyldi viðgangast. Þetta er ein af dapurlegum erfðasyndum frá þessum ruglárum," segir Steingrímur.

Hann segir að með dómnum hafi ákveðinni réttaróvissu verið eytt þó að enn standi eftir réttaróvissa um það hvernig fara eigi með lánin, hvaða vextir eigi að gilda. Þá sagðist Steingrímur vera ósammála þeirri skoðun að stjórnvöld hafi ekki verið í stakk búið til að bregðast við dómi Hæstaréttar.

Loks sagði Steingrímur að það færi eftir því hversu víðtækt fordæmisgildi Hæstaréttardómurinn hefði, hvert áhrif þeirra kynni að verða á fjármálakerfið. „Þetta er stærsti einstaki útlánastapi fjármálafyrirtækjanna, upp á milli 8 og 900 milljarða króna og ef höfuðstóll þeirra er færður niður um 40-6ö% þá er það gríðarleg," sagði Steingrímur. Ef dómurinn ætti við um íbúðalán og lán til fyrirtækja líkt og bílalán gætu áhrifin orðið mjög mikil.