Ætla að opna fimm matvöruverslanir

Ný verslunarkeðja ætlar sér að opna fimm matvöruverslanir á höfuðborgarsvæðinu á næstunni. Auglýst var eftir húsnæði í helgarblaði Fréttablaðsins og herma heimildir blaðsins að viðbrögðin hafi verið góð.

Heimildarmaður blaðsins, sem tengist félagi sem undirbýr stofnun matvöruverslananna, segir að með því að auglýsa eftir um 2.000 fermetra húsnæði á fimm stöðum á höfuðborgarsvæðinu sé nýtt skref í átt að því að opna verslanirnar stigið. Erfitt sé að segja fyrir um hvenær þær verði opnaðar, en ef vel gangi geti hlutirnir gerst hratt.

Samkvæmt heimildum Fréttablaðsins standa erlendir fjárfestar að baki framtakinu. Fjármögnun virðist vel á veg komin, ef marka má auglýsinguna sem birt var á laugardag, þar sem lofað var tólf mánaða leigu fyrirfram.
Ekkert fékkst uppgefið frá forsvarsmönnum hins nýja félags í gær hvers konar verslanir stæði til að opna. Í auglýsingunni var áhugasömum bent á að senda póst á auglýsingadeild 365 miðla merktum „Betri en Bónus", og má því búast við að um lágvöruverðsverslanir verði að ræða. - bj