Innlent

Þjóðaratkvæði um þjóðkirkjuna

Stjórnlagaráðsfulltrúarnir Illugi Jökulsson og Þorvaldur Gylfason. Mynd/GVA
Stjórnlagaráðsfulltrúarnir Illugi Jökulsson og Þorvaldur Gylfason. Mynd/GVA
„Það var niðurstaða okkar að stefna þangað strax," segir Illugi Jökulsson, fulltrúi í stjórnlagaráði. Sú nefnd stjórnlagaráðs sem meðal annars fjallar um trúmál hefur lagt til að þjóðin fái að ákveða það í þjóðaratkvæðagreiðslu hvort hin evangelísk lúterska kirkja verði áfram þjóðkirkja á Íslandi.

Rætt var við Illuga og Þórhildi Þorleifsdóttur í Bítinu á Bylgjunni í morgun. Illugi sagði nefndina hafa fjallað um hvort þjóðkirkjan ætti að hafa stjórnarskrárstuðning umfram önnur trúfélög. „Við töluðum heilmikið um þetta í nefndinni og okkar niðurstaða var sú að það væri í raun og veru sama hvað við gerðum, hvort við settum inn að hún ætti að vera eða fara, þá yrðu umræður og þetta myndi enda með þjóðaratkvæðagreiðslu."

Frá fundi stjórnlagaráðs. „Þeir sem hafa skoðanir á þjóðkirkjunni hafa yfirleitt mjög sterkar skoðanir á henni. Ég held að mörgum sé kannski nokk sama en þeir sem hafa skoðanir hafa mjög sterkar skoðanir til eða frá hvort hún eigi að vera,“ segir Illugi. Mynd/GVA
Stjórnlagaráð vinnur að því að þjóðaratkvæðagreiðslur geti farið fram í auknum mæli. Illugi sagði að þá yrðu málefni þjóðkirkjunnar hugsanlega eitt af fyrstu málunum sem færu í þjóðaratkvæði. Af þeim sökum væri réttast að stefna þangað strax. Þá sagði Illugi: „Það er best að taka það fram að það þarf ekkert endilega að þýða að þjóðkirkjan verði lögð niður og skilið verði á milli ríkis og kirkju. Það þýðir að ekki verður lengur minnst á hana í stjórnarskránni og þá er það löggjafans að halda áfram utan um þau mál."

Illugi sagði afskaplega mikilvægt að afgreiða málefni þjóðkirkjunnar í eins mikilli sátt og hægt væri. Um viðkvæmt málefni væri að ræða. „Þetta er mál sem skiptir fullt af fólki miklu máli. Hvort sem menn hafa sterkar trúarskoðanir eða sterkar trúleysisskoðanir þá er því fólki djúp alvara og það ber að bera virðingu fyrir skoðunum beggja og við ætlum að reyna eins og við getum að afgreiða þetta í eins mikilli sátt og hægt er."



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×