Störf Samgöngustofu flytja út á landsbyggð

Flytja á sjö stöðugildi Samgöngustofu við umferðareftirlit til lögregluembætta úti á landi. Þrjú fara á Norðurland eystra, tvö á Vesturland og tvö á Suðurland. Norðvesturnefnd forsætisráðherra lagði til að störfin yrðu flutt á það svæði en fær engin stöðugildi til sín.

Norðvesturnefndin svokallaða, sem sett var á laggirnar af forsætisráðherra, lagði meðal annars til að fjögur stöðugildi við umferðareftirlit Samgöngustofu yrðu flutt til lögreglunnar á Norðurlandi vestra sem lið í að efla atvinnu og styrkja stoðir byggðar í landshlutanum.

Þessar tillögur voru sendar forsætisráðuneyti í nóvember í fyrra og hafa verið í ár í vinnslu í ráðuneytunum. Það kemur því á óvart að þessar tillögur fái náð ráðuneytisins en störfin flutt í önnur umdæmi.

Nefndin var sett á laggirnar af forsætisráðherra til þess að bæta atvinnuástand á Norðurlandi vestra. Fjöldi tillagna barst forsætisráðuneytinu fyrir ári en engin þeirra hefur enn hlotið hljómgrunn í forsætisráðuneytinu eða öðrum ráðuneytum ríkisstjórnarinnar.

Stefán Vagn Stefánsson, formaður bæjarráðs Skagafjarðar og formaður Norðvesturnefndar forsætisráðherra, telur skrítið að þessar tillögur hafi ekki náð fram að ganga. „Hins vegar fagna ég því að það er verið að færa störf frá höfuðborginni til landsbyggðarinnar. Þetta sýnir okkur svart á hvítu að það er hægt að flytja störf út á land. Úrtölumenn þessarar skýrslu sögðu ekki mögulegt að framkvæma þessar tillögur en annað hefur komið á daginn,“ segir Stefán Vagn.

Í svari ráðuneytis við fyrirspurn Fréttablaðsins kemur fram að markmiðið sé að gera eftirlitið skilvirkara og tengja það lögregluembættum sem fara einnig með önnur umferðarlagabrot. „Þannig verður samtímis hægt að kanna til dæmis ökuréttindi ökumanns, ástand ökumanns með tilliti til ölvunar og vímuefnaneyslu, eftirlit með hraða og svo framvegis. Af því mun leiða betri nýting fjármuna. 

Öllum umferðareftirlitsmönnum Samgöngustofu var boðið að flytjast til lögreglu en þrír starfsmenn af sjö þáðu ekki flutninginn. Embættin þrjú munu því ráða hvert um sig einn lögreglumann í stað þeirra sem ekki þáðu flutning í starfi.“