Sjáðu holurnar í götum Reykjavíkur

Kjartan Magnússon, borgarfulltrúi Sjálfstæðisflokksins, vakti máls á slæmu ástandi gatnakerfisins í Reykjavík á borgarstjórnarfundi í gær og sýndi um 100 myndir sem hann fékk frá íbúum sem sýna vel holurnar í götum borgarinnar. Myndirnar má sjá í albúminu hér að ofan en þær eru teknar víða um borgina, meðal annars í Breiðholti, Vesturbæ, Skeifunni og á Kjalarnesi.

„Ég auglýsti eftir myndum frá íbúm og fékk svo margar að mér vannst einfaldlega ekki tími til að setja þær allar í glærusýninguna sem ég sýndi á fundinum í gær,“ segir Kjartan í samtali við Vísi.

 

Aðspurður hverju hann telur að umræðan hafi skilað segist telja að sér hafi tekist að upplýsa borgarfulltrúa sæmilega um það hvernig ástand gatnakerfisins er. Reykjavík sé það stór að það sé erfitt fyrir hvern og einn borgarfulltrúa að vita nákvæmlega um stöðu mála alls staðar í borginni.

„Það sem að kom kannski skýrast í gegn eftir þessa umræðu í gær og með þessari glærusýningu er að ástand gatna í borginni er ekki viðunandi, eins og meirihlutinn í borginni hefur viljað halda á lofti í umræðunni. Ég gagnrýndi svo einnig borgarstjóra, sem var reyndar ekki á fundinum í gær vegna ráðstefnu sem hann er á erlendis, en ég tel að hann hafi verið á flótta undan fjölmiðlum vegna þessa máls sem sést til að mynda á því að hann hefur sent embættismenn í viðtöl til að svara fyrir þetta,“ segir Kjartan.

Hann segir að Björn Blöndal, formaður borgarráðs, hafi viðurkennt að ástandið væri erfitt en að áætlað væri að setja 500 milljónir króna í malbiksviðhald á þessu ári. Kjartan telur það þó ekki nóg.

„Það þarf að minnsta kosti að setja 700 milljónir í viðhald gatnakerfisins en ef vel á að vera þarf að mínu mati 1200 milljónir á ári til þess að þetta fari ekki svona eins og nú er,“ segir Kjartan.