Innlent

Ólga í Framsókn vegna Evrópumála

Andrés Pétursson
Andrés Pétursson
Titringur virðist vera meðal stuðningsmanna umsóknar Íslands að Evrópusambandinu (ESB) í Framsóknarflokknum vegna yfirlýsingar Sigmundar Davíðs Gunnlaugssonar, formanns flokksins, í gær um að leggja ætti umsóknina til hliðar. Nokkrir foyrstumanna flokksins á höfuðborgarsvæðinu sögðu sig úr honum í gær.

Meðal þeirra eru Andrés Pétursson, sem var í þriðja sæti á lista flokksins í Kópavogi í bæjarstjórnarkosningunum í fyrra, Gestur Guðjónsson, stjórnmaður í Framsóknarfélaginu í Reykjavík, og G. Valdimar Valdemarsson, formaður Framsóknarfélags Kópavogs.

Í bréfi sem Andrés sendi Fréttablaðinu segir hann skrýtið að yfirgefa flokkinn eftir þrettán ár. Forysta flokksins hafi hins vegar sveigt stefnu hans á braut sem sér hugnist ekki. Að ákveða fyrir fram hvort aðild þjóni hagsmunum Íslendinga sé forsjárhyggja sem eigi hvorki skylt við frjálslyndi né víðsýni, segir Andrés, sem er formaður Evrópusamtakanna.

Grein eftir Sigmund Davíð birtist í Morgunblaðinu í gær þar sem hann lagði til að umsóknin að ESB yrði sett til hliðar að sinni. Í Alþingiskosningunum 2009 hafði flokkurinn á stefnuskrá sinni að aðildarviðræður við ESB skyldu hafnar en á flokksþingi í apríl var ályktað að hagsmunum Íslands væri betur borgið utan ESB. Tillaga þess efnis að draga umsóknina til baka var hins vegar felld naumlega. - mþl



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×