Munur milli kynja eykst í uppsveiflu

Kynbundinn launamunur jókst milli áranna 2013 og 2016 meðal félagsmanna Samtaka starfsmanna fjármálafyrirtækja.Þetta er niðurstaða nýrrar kjarakönnunar sem framkvæmd var í febrúar.

Samkvæmt henni eru karlar með hærri laun en konur í 34 af 38 starfsheitum. Meðal fólks í fullu starfi fengu konur að jafnaði greidd 12,9 prósentum lægri heildarlaun þegar búið var að taka tillit til aldurs, menntunar, starfsaldurs og starfsstéttar. Árið 2013 mældist kynbundinn launamunur hins vegar 12,1 prósent og 11,9 prósent árið 2010. Launamunurinn dróst töluvert saman milli áranna 2008 og 2010, og virðist því fara vaxandi í uppsveiflu.

Kristín Ástgeirsdóttir, framkvæmdastjóri Jafnréttisstofu, segir að þessi þróun eigi sér stað, að launamunur í fjármálafyrirtækjum aukist með betra efnahagslífi. „Þannig var þetta fyrir hrun,“ segir Kristín. „Þetta er sérkennilegt og reynslan og umræðan eftir 2007 ætti að kenna okkur að fá fleiri konur inn í þessi fyrirtæki og endurtaka ekki sömu vitleysuna.“