Kom að kúkandi ferðamanni fyrir utan Kirsuberjatréð

Þegar Sara María Júlíusdóttir verslunarstjóri Kirsuberjatrésins kom til vinnu í morgun sá hún ferðamann sem hafði nýlokið við að ganga örna sinna rétt fyrir utan verslunina, sem er til húsa í Vesturgötu 4.

„Þegar ég kom þá stóð Arndís [Jóhannsdóttir, eigandi verslunarinnar] þarna í sjokki. Maðurinn var þá nýbúinn að kúka og pissa þarna við verslunina. Arndís býr þarna á efri hæðinni. Maðurinn var bókstaflega að gera þarfir sínar einum metra frá heimili hennar,“ útskýrir Sara. Hún segir að þær Arndís hafi ekki trúað sínum eigin augum.

„Þetta var eldri maður. Þegar Arndís kom að honum var hann þarna bara á hnjánum. Hann stóð bara upp og labbaði í burtu. Hann stoppaði svo og þefaði af puttunum sínum og fór þaðan inn í Borgarbókasafn. Ég var að hugsa um að hringja yfir og láta fólkið þar vita af þessu, en ég vissi hreinlega ekki hvað ég átti að segja.“

Hún segir að þær hafi þurft að þrífa upp hægðir mannsins. „Já, við þurftum bara að þrífa þetta upp eins og hundaskít. Maður á varla til orð.“ Sara segist svo hafa séð manninn labba aftur framhjá versluninni. „Maður veit eiginlega ekki hvað maður á að gera,“ segir hún ráðþrota.

Í gær fjallaði Vísir um svipað mál við Laufskálavörðu. Þá var talað við Kristínu Ólöfu Steinþórsdóttur leiðsögumann sem sagði: „Ég var með hóp af túristum við Laufskálavörðu í dag þegar ég gekk fram á fullt af pappír. Ég ætlaði mér að tína hann upp – eins og maður gerir til að hafa snyrtilegt í kringum sig – en ég var fljót að láta það vera þegar ég sá að þetta var bara skítur og kúkur á víð og dreif um náttúruna.“

Post by Sara María Júlíudóttir.