Inga Sæland segir öfund og rætni ráða nýjasta útspili ÍÞ

Helgi Helgason, formaður Íslensku þjóðfylkingarinnar, fullyrðir að farið hafi fram fundir að undirlagi Ingu Sæland og Halldórs í Holti, forsvarsmanna Flokks fólksins þar sem lagðar voru fram hugmyndir um einskonar samruna þessara flokka auk Nýs afls. Hugmyndirnar hafi í raun gengið út á að svíkja fé úr ríkissjóði; framlag ríkissjóðs til flokka sem ná yfir tilskilið prósentuhlutfall í kosningum.

„Ef ég hefði ekki verið nýbúin að pissa þegar ég sá þetta, þá hefði ég pissað á mig af hlátri. Svona gæi. Hann er með þessu útspili að sýna sitt innsta eðli. Ég er gersamlega orðlaus,“ segir Inga í samtali við Vísi þegar málið er borið undir hana.

Fjárframlagi skipt eftir kosningar

Helgi lýsir fundum þar sem fram voru lagðar hugmyndir um samstarf flokkanna á Facebook-síðu Þjóðfylkingarinnar. Hann birtir þar jafnframt samningsdrög sem voru fyrirliggjandi. Segir Helgi þetta hafi verið tilraun til að blekkja kjósendur og ná út fé úr ríkissjóði. Í tillögu að samstarfssamningi, sem Inga og Halldór lögðu fram að sögn Helga, segir að: „Stjórnir eða trúnaðarráð 7 félög Þjóðfylkingar, Flokks Fólksins og Nýs afls samþykkja að ganga til kosningabandalags fyrir næstu kosningar með nýju nafni Þjóðfylkingarinnar og listabókstaf ásamt stefnuskrá, sem verði samræmd stefnum allra flokkanna“.

Í lið 7 segir: „Að loknum kosningum er fjárframlagi ríkisins til framboðsins skipt jafn milli flokkanna, eftir að kostnaður hafi verið greiddur.“

Siðlaus samningur

Jafnframt segir að samningurinn gildi fram að stjórnarmyndun ríkisstjórnarinnar.

„Eftir það slíta flokkarnir þessu samstarfi. Hafi samstarfið skilað þingmönnum inn á þing, segja viðkomandi þingmenn sig úr Þjóðfylkingunni. Þessir þingmenn verða þá þingmenn þeirra flokka, sem þeir eru tilnefndir af. Þeir sem voru ásamt þeim, á viðkomandi lista frá flokkunum, segja sig úr þeim.“

Helgi vitnar í Jens G. Jensson sem sat fyrsta fund vegna þessara hugmynda sem segist efast um að samningurinn geti verið löglegur, hann sé að minnsta kosti siðlaus.

„Ég lýsti þegar í stað efasemdum, þar sem okkar skilmálar fyrir samruna voru að FF yrði lagt niður, meðlimir FF myndu ganga í ÍÞ, Inga Sæland gæti valið sér oddvitasæti í Reykjavík. öðrum frambjóðendum FF yrði fléttað inn á lista ÍÞ og stefna FF í velferðarmálum yrði gerð að stefnu ÍÞ,“ segir Helgi í yfirlýsingu sem finna má á Facebook-síðu Íslensku þjóðfylkingarinnar. Og bætir við: „Andstæðingar ÍÞ bera út sögusagnir og rógburð um þessar viðræður um samruna hafi strandað á ÍÞ, en hér eru staðreyndirnar lagðar á borðið.

Það er fyrir neðan mína virðingu sem formanns stjórnmálaflokks að vera viðriðin slíkan gjörning.“

Inga áheyrnarfulltrúi að engu

Inga á vart orð í eigu sinni vegna málsins. Hún segir enga lygi að í byrjun, þegar hún var að stofna flokkinn, hafi verið háværar raddir uppi um að reyna að sameina krafta minni flokkanna. Og þá þannig að atkvæði greidd þeim færu ekki forgörðum.

„Ég er ekki ekki pólitíkus. Er blaut bak við bæði eyrun. Halldór kom með þetta, hvort mér þætti ekki ástæða til að skoða þetta? Mér hugnaðist aldrei að tala við Íslensku þjóðfylkinguna. Ég var áheyrnarfulltrúi. Áheyrnarfulltrúi að engu. Því þetta voru engar viðræður heldur spjall um ekki neitt. Þegar þetta var þá var Halldór í Holti ekki einu sinni í flokknum,“ segir Inga sem veit ekkert hvaðan þessi samningsdrög eru komin. Og þau sýni í raun hvorki eitt né neitt, enda engin undirritun eða neitt á plagginu, sem hún kallar svo.

Rætin öfund sögð ráða þessu útspili

Inga segist ekki muna hvenær þetta var. „Þá var ég ekki búin að koma fram í sjónvarpinu og fólk áttaði sig kannski ekki á því að ég hafði rödd sem fólk vildi hlusta á. Nú vildu allir Lilju kveðið hafa. Helgi var einn að spjalla um ekki neitt, hann segir ekkert nema fátt sem er þá einungis til að upplýsa um sitt innsta eðli. Þarna ræður rætin öfund og ótrúlegt að nokkur maður skuli leggjast eins lágt útaf nákvæmlega engu,“ segir Inga um frásögn formanns Íslensku þjóðfylkingarinnar.

„Þeir eru að bjóða fram í tveimur kjördæmum og eina markmiðið, ef hann hefur einhverja hugsjón, er að eyðileggja fyrir okkur sem viljum vinna að almannahag. Hvernig dettur honum í hug að koma svona fram? Ég vildi gjarnan ræða þetta við hann í sjónvarpi og verka hann til.“