Innlent

Hlaupið í rénun

Mynd/vilhelm
Hlaup sem hófst í vestanverðum Vatnajökli í gær virðist hafa náð hámarki og er nú í rénun. Tvö virkjanalón Landsvirkjunar, Hágöngulón og Þórisvatn, taka við vatninu og engin mannvirki eru talin í hættu.

Órói á jarðskjálftamælum frá því í gærmorgun og fram yfir miðnætti benti til þess að um jökulhlaup væri að ræða. Vatnsborð í Hágöngulóni hækkaði um 70 sentimetra í nótt og morgun. Hjörleifur Sveinbjörnsson, jarðfræðingur hjá Veðurstofu Íslands, segir hugsanlegt að um eina spýju hafi verið að ræða. Úr Hágöngulóni fer hlaupið niður um Köldukvísl og þaðan í Þórisvatn.

Hlaupið náði hámarki á milli klukkan tvö og fjögur síðastliðna nótt og þá var rennsli inn í lónið að meðaltali um 2000 rúmmetrar á sekúndu. Eftir það dró hratt úr hlaupinu og er rennsli inn í Hágöngulóni nú komið niður í 200 rúmmetra á sekúndu, að því er fram kemur í tilkynningu frá almannavörnum. Lónið tók því að mestu við hlaupinu og umtalsverðra vatnavaxta er ekki að vænta neðan þess, hvorki í Köldukvísl né Þjórsá. Þó að vatnsmagn Köldukvíslar hafi aukist verulega er ekki mikilla vatnavaxta að vænta neðan lónsins.

Hjörleifur telur líklegt að hlaupið megi rekja til hvera- og jarðhitavirkni við Skaftárkatla.

Almannavarnadeild ríkislögreglustjóra hefur fylgst náið með ástandinu og Landsvirkjun, Landsnet og lögreglustjórar hafa verið upplýst um stöðuna. Flogið verður yfir vestanverðan Vatnajökul um leið og tækifæri gefst en eins og stendur er skýjahula yfir jöklinum. Vísindamenn fylgjast með framvindunni og eru í nánu samstarfi við almannavarnadeild.




Tengdar fréttir

Jökulhlaup undan Vatnajökli

Jökulhlaup virðist vera hafið undan Köldukvíslarjökli, sem er í vestanverðum Vatnajökli. Vatnsborð í Hágöngulóni hækkaði um 70 sentimetra í nótt og morgun, að sögn Hjörleifs Sveinbjörnssonar, jarðfræðings hjá Veðurstofu Íslands.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×